Assam MLA SBI account aṭangin cheng nuai 14 ruchhuak

Assam Legislator Utpal Dutta chu a State Bank of India Account aṭangin cheng nuai 14 ruksak a ni.

Utpal Dutta hi BJP kaihhruai sorkar-a Asom Gana Parishad (AGP) MLA niin Guwahati-a Dispur-a a bank account aṭangin a pawisa hi ruksak a ni a, pawikhawihtute hi tute nge an nih hriat a la ni lo. A pawisa hi engtik lai aṭanga ruksak nge a ni tih hriat a ni lo a, a nupui in cheque hmanga pawisa la chhuak tura bank a kalin hriatchhuah a ni chauh a, hriatchhuah a nih velah MLA hi rang takin SBI branch-ah hian tlan nghalin a mobile number a register-na chu May 19 khan thlaksak a ni tih hriatchhuah a ni a, thlak a ni tih hi amah hian engmah a hre lo tih a sawi.

Dutta hian Dispur police station-ah FIR thehlut nghal in SBI Dispur-a a account, account number 10821663278 chu May 19 khan khawihchingpensak a nih thu a ziak a ni.

AGP MLA chuan FIR-ah hian a account a link-na phone number chu a hriatpuina tel loin May 19 khan thlaksak a nih thu ziakin internet banking pawh a phalna ni lo in activate a nih thu a ziak. Document pawimawh te chu a dil chuan bank thuneitu lam chuan an pechhuak thei lo niin a ziak bawk.

Dutta pawisa ruksak tute hian internet banking kaltlangin pawisa hi an ruksak nia sawi a ni.

Utpal Dutta chuan a nupuiin cheng 45, 000 cheque hmanga lakchhuah a tum chuan hetiang zat pawisa hi a account-ah a awm lo tih an lo hrilh thu a sawi a, bank document-te chu an enfel hnuah an account a register-na mobile number chu thla hnih kalta khan thlak a nih thu a sawi bawk.

MLA chuan bank hna­thawk ṭhenkhat chu he thilah hian an inhnam­hnawih tih sawiin bank thuneitute lam chuan an ṭanpui ṭha duh lo tih a sawi a ni.

Utpal Dutta hi La­khimpur assembly con­stituency bialtu MLA niin a pawisa bo dan hi police te chuan an chhuizui mek a ni.