MUSU in darkar 48 state pum huap nawrh huaihawt

Manipur University Students Union (MUSU) chuan nimin aṭang khan state pum huap nawrh huaihawtin July 19 zanlai thleng a awh ang.

MUSU office thupuangtu M Dayaman chuan University Vice Chancellor Adiya Prasad Pandey-a chhuahtir a nih chauh loh chuan an band huaihawt tum chu an ṭhulh dawn lo tih a sawi.

Dayaman chuan an duh lohna hrang hrang tilang mah se thuneitu lamin an duhna te chu an ngaihsak duh lo tih a sawi a, an duh ber chu vice-chancellor chhuahtir a nih thu sawiin high-level independent inquiry committee din an duh thu a sawi bawk. An duhna te chu hnawlsak an nih tak avangin state pum huap nawrh huaihawt mai loh chu duhthlan tur dang an nei tawh lo tih a sawi a ni.

Zirlai pawl dang te leh civil organization dangte chu darkar 48 nawrh an huaihawt chu thlawp tura ngenin Bandh an huaihawtna chuan hriselna, media leh sakhaw thilte erawh a huam dawn lo tih a sawi bawk.

State pum huap bandh puan a nih hma lawk hian Democratic Students’ Alliance of Manipur (DESAM) pawla zirlai ṭhenkhat chu police ten an dannaah hliam an tuar a, hliam tuar zingah hian DESAM general secretary pawh a tel a ni.

DESAM te hian MU vice-chancellor Adiya Prasad Pandey chhuahtir an duh thu thuziak te kengin Raj Bhavan leh BJP Manipur office panin kawng an zawh a, police te hian hnawhdarh an tumna lamah zirlai ṭhenkhat chuan hliam an tuar a ni.