Tripura-ah SpiceJet in an operation titawp dawn, State sorkar in Civil Aviation Ministry ṭanpuina dil

Tripura sorkar chuan SpiceJet in September 1 aṭangin Tripura-a an operation an titawp dawn tih an puan avangin Civil Aviation Mi­nis­try hnenah an harsatna sukiang turin ṭanpuina a ngen.

Chief Minister Biplab Kumar Deb chuan hemi chungchang hi amah ngeiin Civil Aviation Minister Jayanat Sinha hnenah a hriat­tir nia tarlan a ni. Sinha hnenah hian tuna Agartala Airport a thlawhtheihna service mek chu a pangngai renga a kal theihna turin hmalakpui turin a ngen a ni.

SpiceJet thuneitute chuan July 11 khan thuchhuah siamin Airport Director hnenah September 1 aṭangin an service an titawp dawn tih an hriattir a, August 1 hian an thlawhtheihna a hnuhnung ber atan an thlawhtir dawn tih an sawi. Airport Director hnena an lehkha thawnah hian an service an tihtawp tumna chhan hi an tarlang lo.

Tripura-ah hian kum 2012 khan Jet Airways chuan an service an lo titawp tawh a, airlines tenau dangte pawhin an service an lo titawp nual tawh a ni. Thudawnnain a tarlan dan chuan heng private airline ṭhenkhat te hian helai region-a an service aṭang hian hlawkna tam tak an nei lem lo a, hemi vanga inhnukdawk hi an nih hlawm rin a ni.

SpiceJet bakah hian Tripura-ah hian Indigo leh Air India chuan operation an kalpui mek a, Indigo bik hian Agartala leh Kolkata, Guwahati, Imphal leh Silchar inkarah te direct flight an service tir a ni.

Aiprort thuneituten leh­kha an dawn velah hian Chief Secretary leh Tran­sport Secretary hnenah an lehkha dawn hi an forward nghal a ni.