AP: CM in Ministry of Civil Aviation hnenah Green Field Airport sanction thuai turin ngen

Arunachal Pradesh Chief Minister Pema Khandu chuan union minister of state for civil aviation Jayanat Sinha hnenah Thawhṭanni khan Hollongi-a Green Field Airport siamna tur sanc­tion thuai turin a ngen.

Union Minister of State for Civil Aviation Jayant Sinha leh Pema Khandu hian New Del­hi-ah meeting neiin Hollongi aiport siamna tura buaina neuh neuh awm zawng zawng te chu state sorkar in an chingfel vek tawh tih a hrilh a ni. Ruahmanna awm ang te pawh Ministry of Civil Aviation hnenah hriattir a ni tawh bawk.

AAI (Airports Autho­rity Of India) project Hollongi-a kalpuina tura ruahmanna awm zawng zawng hi July 20, 2018-ah chuan buatsaih zawh hman tura beisei a ni a, July 20, 2018 hian Ministry of Civil Aviation hnen a thlen hman rin a ni. Ruahmanna te hi Steering Committee chuan an la pawmpui leh a ngai bawk a, clearance ngai zawng zawng te nen August-ah chuan an pawmpui hman beisei a ni.

Arunachal Pradesh hi India ramchhunga state capital-a airport nei lo tlemte zinga mi a ni a, Chief Minister Pema Khandu chuan Union Minister hnenah hian clearance zawng zawng a chak thei ang bera thawnchhuah sak turin a ngen bawk.

MoS Sinha pawhin Hollongi Green Field Airport project chu a ngaihpawimawh ber zinga mi a nih thu a sawi ve bawk a ni.