Nagaland sorkarin AFSPA sut turin sorkar laipui ngen dawn ; Cabinet meeting-in Hornbill Festival tihtawp a rel

Nagaland-a security force-ten hel emaw tia an hriatsual vang nia sawia civil mite an kahhlum hnuah, Nagaland sorkar chuan sipai hnena thuneihna sang zawk pekna, Armed Forces Special Powers Act (AFSPA) hman mek chu sut turin ziakin a ngen dawn.

Nimin zinga cabinet-in urgent meeting an neihah hei hi an rel a, hei bakah hian Hornbill Festival neih mek pawh tihtawp an rel bawk. Kum tina an neih ṭhin, Hornbill Festival hi December 10 thleng awh tur a ni a, a hmain Thawhṭanni bik khan civil mite thihna thleng duh lohna lantirin ṭhulh a lo ni tawh a, nimin khan festival hi neih chhunzawm tawh loh an rel leh ta a ni.

Nagaland chief minister Neiphiu Rio chuan AFSPA chuan an state-ah buaina leh natna tam tak a thlen tawh a ni tiin, he dan hi India hmel tichhetu a ni bawk tih security force-ten kahhlumte vuinaah a lo sawi tawh bawk.

"AFSPA hian sipaite chu arrest warrant awm loin civil mite man theihna, in dapsak leh that theihna hial thuneina a pe a ni. Hetih lai hian security force-te chungah action lak letna tur a awm lo thung. Dan leh thupek palzutna thlentu zawk a ni," tiin Chief Minister chuan a sawi.

Dan sakei tia sawi ṭhin, AFSPA hnuaiah sipaite hi thil dik lo ti nia an rinhlelhte man leh kah theihna thuneihna a pek laiin, he dan hian sorkar laipuiin a remtihpui a nih loh chuan sipaite hi thubuai siamsakna tur lakah a hum tlat thung. Hetichung hian Nagaland-a pawikhawihna thleng vang hian Nagaland police-te civil mite kaptu, army unit chu tum reng vanga tualthah tum tia puhin tualthah thubuai an siamsak a ni.