Sonowal-a'n Manipur-a Integrated AYUSH Hospital a hawng

Union Minister of AYUSH and Ports, Shipping and Waterways Sarbananda Sonowal chuan virtual hmangin Moreh, Manipur-a khum 50 awmna Integrated AYUSH Hospital a hawng.

Sarbananda Sonowal chuan AYUSH ministry-in Manipur state-ah AYUSH dispensary 15, khum 10 awmna hospital pasarih, school herbal garden 100, district 16-ah nursery 16 leh health and wellness centre (HWC) 50 din a tum thu a sawi.

India rama ramhmul damdawi, medicinal plant 6,000 zinga 1,000 chuang zet chu Manipur-ah an awm tih sawiin, Sonowal chuan hengte hi hman ṭangkai dan thiam a ṭul thu a sawi a ni. Manipur hmeichhiate chuan chak tak, danglamna bik tak nei an ni tiin, an state-a medical plant-te chu chawi lar tura hma la turin a chah. An thil siam chhuahte chu a zawrhchhuahna lamah puih an inhuam thu a sawi bawk a ni.