Assam police-ten a article ziah vangin Silchar-a journalist thubuai siamsak

Assam police-te chuan Silchar-a journalist, Anirban Roy Choudhury chu a news portal-a a thu ziah avangin thubuai eng emaw zat an siamsak a, thubuai siamsak zingah hian Indian Penal Code (IPC)-a Section 124 (A) hnuaiah sorkar laka hel tura mipuite fuiha puhna pawh a tel.

Anirban Roy Choudhury hian Cachar district-ah news portal, Barak Bulletin a siam a, November thlaa sorkar laka hel tura mipuite fuiha puh vanga man, politician Pradip Dutta Roy thlawpna thu ziakah puhin, December 1 khan Silchar-a cheng, Santanu Sutradhar chuan a lakah complaint a thehlut a ni.

Cachar SP Raman Dhillon chuan complaint an dawn angin, thubuai hi ziahluh a nih thu leh, an chhuichian mek thu a sawi. Complaint thehluhah hian Choudhury article ziah chuan Assam-a Bengali leh Assamese-te inunauna a tichhe thei a ni, tiin a sawi.

Kum 31 mi, Choudhury hi Thawhṭanni khan Silchar Sadar Police station-ah in report tura tih a ni a, Choudhury chuan police-te chu ṭha taka a thawhpui tur thu a sawi. Hemi rual hian hetiang thil avang hian Barak Bulletin chu a zam mai dawn lo tih sawiin, "Barak Bulletin dintu ka nih angin, engmah kan hlau dawn lo. A ṭha tur nia kan hriat angin kan ziak zel dawn a, roreltute sawisel a ṭul anih pawhin kan ti zel ang," a ti.

Barak Democratic Front convenor, Pradip Dutta Roy hian Assamese ṭawnga sorkarin hoarding a siam chu darkar 48 chhunga la thla tura phutin, lak thlak a nih loh chuan an party-in lungawi lohna lantir an tum thu a sawi. Hemi hnuah hoarding hi lak thlak ni mah se, Roy hi November 27 khan thubuai siamsakin man a ni zui a ni.