Civil mite thah chungchangah NHRC-in sorkar laipui leh Nagaland sorkar hriattirna a pe

National Human Rights Commission (NHRC) chuan Nagaland-a Army parya commando-ten beihpui an thlaknaa an fimkhur loh avanga civil mi eng emaw zat an thah chungchangah, sorkar laipui leh Nagaland sorkar chu hriattirna a pe.

NHRC chuan Thawhṭanni khan hriattirna hi defence secretary, union home secretary leh Nagaland-a chief secretary leh director general of police-te hnenah a pe a, kar ruk chhung ngeiin he thil thleng chungchang report kimchang pe turin a hrilh a ni.

Commission chuan security force-te chuan hel kaihhnawiha beihpui an thlak leh hma an laknaah, a hma aṭangin fimkhur takin, ruahmanna fel tak an siam tur a ni, a ti. He thil thleng avang hian Assam Rifles camp beih a nih phah a, civil mite leh sipaite inkarah buaina chhuakin hliam tuar leh nunna chante an awm belh phah a ni, a ti.

Report thehluh turah hian thil thlen dan chhuitu, Special Investigation Team (SIT) thil chhui dan te, sipaiten an kahhlum tak chhungte hnena zangnadawmna pek zat te, hliam tuarte enkawl an nih dan leh, he pawikhawihna thlenga mawhphurtua puha thubuai siamsakte chungchang pawh thehlut tel vek turin a ti bawk.