Nagaland : Sipaiten an mi kahte enfiah tumna an nei lo : DGP report

Nagaland-a Mon district-a sipaiten fimkhur lo taka beihpui an thlaknaa hriatsual vanga civil mite an kahhlum chungchangah, Nagaland director general of police (DGP) T Jong Lungkumer leh commissioner Rovilatuo Mor-ten joint report an tichhuak.

DGP leh Commissioner-te report chuan, sipaite hian kar liam ta Inrinnia sipaiten hel emaw tia pick-up truck-a chuang, civil mite bei a, an kah hnuah an mi kahhlumte hi enfiah tumna pawh an nei lo tih an sawi. Tualchhung mite chuan motor an lambunna hmuna thi, civil mi parukte ruang chu sipaite hian tuam boin, an pick-up van-in an base camp lamah lak an lo tum tih an sawi a ni, an ti.

State sorkar hnena report an thehluhah, December 4 tlaia security force, 21st para special force-ten pick-up truck-a chuang, civil mite an lo beih thawm hi tualchhung miten an hriat veleh an tlankhawm nghal a, special force-ten ruang paruk thuhruk an tum lai hi an va hmu a, hei vang hian mipui thinrimin sipaite hi bei zuiin buaina a chhuak zui a ni, an ti. Mipui pungkhawmte hian security force-te motor pathum an halsak tih an sawi bawk.

Sipaiten ding turin an hrilh lo tih sawi
Union home minister Amit Shah-a'n Nagaland-a thil thleng chungchang Parliament-a a sawifiahnaah, sipaite hian civil mite phurtu truck hi ding turin an ti a, mahse ding loa a tlan tlang avangin helho an chuang nia ringhlelin an kap ta niin a sawi. Mahse motor-a chuang, damchhuak pahnih zinga pakhat chuan sipaite hian ding turin an signal lo a, an lo kap nghal tawp niin a sawi thung.

Kum 23 mi, Sheiwang hi a awmah leh banah silaia kah fuh niin Dibrugarh-a Assam Medcial College and Hospital(AMCH)-ah enkawl mek a ni. Thawhlehni zana The Indian Express-in a kawmnaah, Sheiwang chuan he thu hi a sawi a ni. Damchhuak dang pakhat, kum 30 mi Yeihwang pawh he damdawi-inah hian enkawl mek niin, a lu lamah hliam a tawrh avangin ani chu ala ṭawng chhhuak ṭha thei lo a ni.

Sheiwang chuan, "Ding turin min hrilh lo a, min rawn kap nghal tawp a ni. Tlanchhiat pawh kan tum lo, motor chhungah kan awm vek a ni," a ti. Sipaiten an kah lai hian khua pawh a thim lo tih a sawi bawk.

Vawiinah NSF-in lungawi lohna lantir dawn
Naga Students' Federation (NSF) chuan vawiin hian Mon district-a civil mite beih vang leh, sipaite kut tuara civil mi 14-te thihna thleng avangin lungawi lohna lantir an tum.

NSF president Kegwayhun Tep leh general secretary Supuni chuan Kohima-ah boruak muanawm tak hnuaia lungawi lohna lantir a ni dawn tih sawiin, hei hi security force-te kut tuara thi, civil mite ni nga chhung sunna hun hmang tur leh, North East Student's Organisation (NESO)-in hmarchhak bial aṭanga dan sawisel hlawh tak, Armed Forces Specials Powers Act (AFSPA) sut tura an phutna nawrna pakhat a ni tel bawk tih an sawi.

Zirlai pawl chuan Nagal mipuite chu lungawi lohna lantirnaah hian tel vek tura ngenin, state sorkarin mipuite tawrhna ṭawmpui a, Hornbill Festival a titawp chu lawmawm an tih thu an sawi bawk. AFSPA chungchang sawiho a, he dan hlip tura phutna resolution siam turin Nagaland Legislative Assembly chu special session nei turin an phut bawk.