Manipur: VC duh loh lantirnaah Zirlai eng emaw zatin hliam tuar

Manipur University vice-chancellor Adya Prasad Pan­dey chhuahtir tura nawrh huai­hawtnaah Thawhlehni khan Kangla Fort-ah police-ten an vuaknaah zirlai pasarih velin hliam an tuar.

Kangla Fort hmaah hian Democratic Students’ Alliance of Manipur (Desam)-te chuan human resource development minister Prakash Javadekar, Manipur chief minister N. Biren Singh leh MU VC Pandey-te lem/lim an siamchawp chu an hal bawk.

Thawhṭanni khan Desam in nawrh an huaihawtnaah Desam general secretary Shital Oinam chuan hliam a lo tuar tawh bawk a, damdawi-in panpui hial a lo ni tawh a ni. Zirlai pawl te hi Thawhṭanni khan Chief Minister bungalow luh an tumna lamah police-te nen an innekbuai a ni.

Desam president Salam Akash chuan state sorkar chuan Manipur University buaina hi a la thutak hle tur a nih laiin buaina hi a tipunlun zawk tih a sawi a, Manipur-a zirna boruak an tichhe nasa hle niin a sawi bawk. HRD Ministry in an duh ang chhanna an pek hma chuan nawrh chu an chhunzawm zel dawn tih a sawi. Ministry thutlukna chu zirlaite duhdan kalh a ni tur a ni lo, tih sawiin Manipur University Students’ Union in darkar 48 state pum huap nawrh a huaihawt pawh chu an thlawp tih a sawi.

Akash chuan Pandey-a lam ṭang in-charge registrar M. Shyamkesho leh deputy registrar R.K. Jotin te chu mipuiin zirlai an zirtir a ngai tih a sawi a, MU buaina hi an haider lui tlat a ni, a ti. Sorkar laipui chuan zirlaite leh zirtirtute duhdan chu a ngaipawimawh lo a nih chuan nasa zawka nawrh an buatsaih dawn thu a sawi bawk a ni.

Zirlai pawl hian khawpuiah nawrh hi an huaihawt an, anmahni thlawptute pawhin Imphal East hmun hrang hrangah leh Thoubal district-ah te pawh nawrh hi an huaihawt ve mek bawk.

MUSU hian May 30 aṭang khan nawrh hi an huaihawt ṭan tawh a, June 6 aṭang khan Uni­versity hi khar a ni tawh bawk. Zirtirtute leh University staff-te pawhin zirlaite hi an thlawp a ni.

Zirlaite hian Pandey-an a tihkhawtlai, exam result te chu chhuahtir an phut bawk a, Thawh­lehni kha chawngheia an nawrh ni kuana chiah a ni tawh nghe nghe.

Hetihlai hian Biren Singh-a a kaihhruai BJP aiawhte chuan MU buaina chungchangah hian Javadejar an lo hmu tawh bawk a, state cabinet in ruahmanna a neih ang te pawh an hrilh bawk nia tarlan a ni.