APSC scam: BJP MLA-in a fanu thlavang hauh

Assam-a Tezpur MP, BJP MLA R P Sharma chuan Thawhṭanni khan Assam Public Service Commission (APSC) scam-a a fanu thu zawhfiah tura koh a ni ve chu politics hmanga inbeihna mai a nih thu a sawi.

Sharma fanu Pallavi Sharma, Assam Police Service (APS) officer 2016 batch leh sorkar official dang 19-te chu Pathianni khan APSC scam chungchanga thu zawhfiah tura koh an ni.

RP Sharma chuan a fanu an puhna chu dawt a nih thu a sawi a, amah an puhchhiat tumna vang a nih thu a sawi bawk. 2019 Lok Sabha-a an party ticket-a a din theih lohna tura amah beitute hmalakna a nih thu a sawi bawk.

Hemi chungchanga inbeihna hi kum khat leh a chanve dawn a nih tawh thu sawiin, a fanu chu dik tak leh fair taka a inziah tlin thu a sawi. Handwriting test forensic laboratory-a an neih hunah engkim a chiang dawn niin a sawi a ni.

APSC buainaah hian a hnarkai tu bera puh APSC chief hlui Rakesh Kumar Paul (55) chu 2016 khan man a ni tawh a, hemi hnu hian hmun hrang hrangah handwriting test neih a nih hnuah mi 44 vel man an ni tawh a ni. Heng an mi man te hian hna an hmuhna turin thamna an pe nia hriat a ni a, cheng nuai 15 aṭanga 30 inkar vel an pe ṭhin niin police-te chuan an lo sawi tawh nghe nghe a ni.

Additional SP, Dibrugarh, Surjit Singh Panesar chuan Pathiannia an koh officer 19-te hi Guwahati-a Assam Police special branch-ah nimin khan inlan tura hriattir an nih thu a sawi a, hetah hian an handwriting te chu enfiah sak an ni dawn tih sawiin, scientific evidence pawh neih ngei an tum thu a sawi bawk.