Arunachal-ah ni 30 chhung pawnlam sangha zawrh khap
Arunachal Pradesh-a capital complex district administration chuan Thawhṭanni aṭang khan hmarchhak aṭang niloa sangha lakluh a khap a, hei hian ni 30 a awh ang.
Deputy Commissioner Prince Dhawan kaihhruaina hnuaia district thuneitu te ṭhutkhawmnaah thutlukna hi siamin sangha chhiat mai lohnan formalin hman ṭhin a nih avangin hmundang aṭanga sangha lakluh hi an khap a ni.
Meeting an neihnaah hian sangha vawnṭhat nana formalin hman hi mihring hriselna atan a pawi theih avang leh a hlauhawm theih avangin capital complex thuneitute chuan mipui him tlan zawk nan pawnlam aṭanga sangha lakluh hi khap hrih turin thutlukna an siam ta a ni.
Assistant Food Controller Lokham Manga chuan sangha-ah chemical hman a nih leh nih loh enfiahna tur test kit an chah mek thu sawiin, ni 10-15 hnu velah a lo thlen beisei a nih thu a sawi.
DC chuan district official, DMO leh food safety officer-te chu sangha te enfiah tura chahin surprise check te pawh nei turin a ti a, sanghaah chemical a tel ngei em tih te pawh enfiah turin a ti bawk.
Capital complex-a market welfare associations/bazaar welfare committee te chu fimkhur tura chah bawkin, chemical a tel nia an hriat chuan thuneitu lam hnena hriattir turin a ngen bawk a ni.
DC chuan Itanagar leh Naharlagun EAC te chu dan loa zuar an awm leh awm lo rel kawng velah te pawh check turin a ti a, highway leh rel kawnga dan loa thil zawrh te chu phal lo turin leh a zawrhna tur hmun diktakah chiah thil zuar tura hma la turin a ti.
Itanagar Market Welfare Association (IMWA) president Yumlam Achung chuan IMWA chuan bazara thil zawrh turte chu fimkhur taka an enfiah ṭhin thu sawiin, Nirjuli Market Welfare Association president Tarh Tamey pawhin an thil rinhlelh chu an bazar-a zawrh an phal dawn loh thu a sawi ve bawk.