Meghalaya Public Service Commission beihna SIT in chhui dawn

Meghalaya Public Service Commission (MPSC) building chu kar hmasa Thawhlehni khan petrol bomb hmanga beih a ni a, hemi chhuichiang tur hian Special Investigation Team (SIT) din a ni.

East Khasi Hills SP, Davis NR Marak chuan hemi chungchang hi sawichhuakin SIT hi EKH SP (City), Steve Rynjah chuan a kaihruai dawn tih a sawi a, Team-ah hian Additional SP (headquarters), Sadar Police Station Officer incharge bakah police officer dang pahnih an tel dawn bawk tih a sawi.

Marak chuan MPSC beihna hi an ngaihpawimawh thu sawiin SIT din a nih chhan pawh hi rang taka pawikhawihtute chhuichhuah an nih theihna tura tih a nih thu a sawi a ni.

EKH SP chuan hemi chung chang­ah hian thlir dan hrang hrang a awm thei tih a sawi a, mita hmutu ten mi pahnih building aṭanga lo chhuak an hmuh thu an sawi chu an chhuizui thu a sawi bawk.

July 10 zingah khan MPSC building hi pertrol bomb hmanga beih a ni a, hemi hnu lawk hian building aṭang hian mi pahnih an lo chhuak nia sawi a ni a, heng mi pahnihte hi tute nge an nih hriat ni lo mah se pawikhawihtu nia rinhleh an ni.

CCTV aṭangin chhuizui mah se bomb tihpuahna lai velah hian CCTV hi dah a nih loh avangin chhui­chhuah mai a harsa tih a sawi.