Sangha-ah formalin hmuh a nih hma chuan lakluh khap dawn lo: Hek

Meghalaya sorkar in ni 15 chhung atan state chhunga sangha lakluh khap a nih thu a puan hnu lawkah state Health and Family Welfare Minister, Alexander L Hek chuan Nilaini khan sanghaah formalin hman a ni tih hmuchhuah anih hma chuan sangha lakluh an khap dawn lo tih a sawi ve leh thung.

Chanchinthar lakhawm tuten an kawmnaah Hek chuan sanghaah formalin hman ngei a ni tih an finfiah hma chuan sangha lakluh chu an khap dawn lo tih a sawi a, hei hi sorkar thu­chhuah siam nen a inpersan avang­in titi a titam hle.

Hetihlai hian Hek chuan formalin hi hman ngei a ni tih an hmuchhuah chuan sangha lakluh an khap nghal dawn tih a sawi.

H&FW Minister chuan sangha sample 26 State Public Health Laboratory, Assam-ah test tura an thawn mek thu sawiin heng zinga 50%-ah hi chuan formalin hmun a nih loh thu a sawi a, an la test bang zawng result hi karhnih chhunga hriattir an nih leh tur thu a sawi bawk a ni.

Hetihlai hian a test-na kit (Formaldehyde detection kit) pawhin an state a thlen tawh thu sawiin Fisheries leh Health and Family Welfare department official te chuan hemi hmang hian state chhunga sangha lakluh te chu an lo endik zel dawn tih a sawi. Sanghate hi state pawn lam aṭanga an lakluh bakah hian tualchhung sangha te pawh an endik dawn tih a sawi bawk.

Fisheries Minister, Comi­ngone Ymbon chuan Me­ghalaya-ah hian kumtin sangha metric tonne 21,000 lakluh ṭhin a nih thu a sawiin East Khasi Hills bikah ringawt pawh hian metric tonne 15000 vel an lakluh ṭhin thu a sawi.