AFSPA hian inhmelmakna bak a thlen lo : Nagaland MP

Nagaland MP KG Kenye chuan Nilaini khan Rajya Sabha rorel inkhawmah December 4-a Nagaland-a security force-ten civil mi 14 an kahhlum chungchang sawiin, Armed Forces (Special Powers) Act (AFSPA) chu hlip turin a phut. "AFSP hian eng thil ṭha mah a thlen lo a, inhmelmakna bak a thlen lo a ni," a ti.

Rajya Sabha-a Zero Hour hmannaah he thu hi sawiin, MP Kenye chuan kum 63 liam taa sipai hnena thuneihna sang pekna tur bill pass a nih ṭum a MP-ten he dan hi civil mite laka hmansual a hlauhawm chungchang an lo sawichhuah tawh kha, Nagaland-ah a takin a lo thleng ta a ni, tiin a sawi.

AFSPA vanga nunna chan an tam tawh : NPF MP
Naga People's Front (NPF) MP Lorho Pfoze pawhin Nilainia Lok Sabha inkhawmah Nagaland-a security force-ten pawisawi lo civil mi 14 an kahhlum chungchang sawiin, sipai hnenan thuneihna sang pekna, Armed Forces (Special Powers) Act (AFSPA) vangin hmarchhak bialah mi tam takin nunna an chan phah tawh a ni, a ti.

Lok Sabha-a Zero Hour-ah Outer Manipur MP Pfoze chuan AFSPA vang hian Manipur, Nagaland, Meghalaya, Assam leh Arunachal Pradesh mipuite tawrhna a thleng fo a, mi tam takin nunna chanin hmeithai tam tak an awm phah a, pawngsualna pawh a thleng fo a ni, tiin a sawi.

Thawhlehni khan National People's Party (NPP)-a Meghalaya MP Agatha Sangma pawhin dan sakei tia sawi ṭhin, AFSPA chu hlih a hun tawh tih Lok Sabha inkhawmah hian a lo sawi tawh bawk.

Oting khaw miten Amit Shah thusawi sawisel
Security force-ten civil mi an kahhlum zinga mi 12-te chenna, Oting khua chuan Parliament-a union home minister Amit Shah-a'n thil thleng chungchang a sawi dan chu sawiselin, sipaiten hel laka beihpui thlak nia an insawi chu thu dik lo leh phuahchawp niin an sawi a, an beihpui thlak chu civil mite suatna zawk a ni, an ti.

Oting khaw aiawh Oting Citizens Office-in thuchhuah an siamah, December 4-a thil thleng vang hian an khuaah party leh pawl hrang hrang bakah Indian armed force-te chu tiam chin awm loin luh an khap tih an sawi.