Assam-Meghalaya border : Regional committee 2-in report thehlut tawh

Assam leh Meghalaya ramri buaina neih mekte chinfel dan buaipui tura Meghalaya sorkarin regional committee a din zinga pahnih chuan Nilaini khan chief minister Conrad K Sangma hnenah report an thehlut.

State pahnihte hian regional committee hi September thla khan an din ve ve a, heng committee-te hi ramri chungchanga buaina an neihna hmun parukte tlawh a, state sorkar hnena report thehlut turin an ti a ni.

Report thehlutte hi deputy chief minister Prestone Tysong kaihhruai Ri-Bhoi regional committee leh, Renikton Tongkhar kaihhruai West Khasi Hills regional committee-te an ni. Urban affairs minister Sniawabhalang Dhar kaihhruai East Jaintia Hills commitee erawh chuan state sorkar hnenah December 15 thleng hun pek belh turin an dil thung.

Deputy CM Tysong chuan an report-te hi CM hian a la enzui dawn tih sawiin, puanzar theih a la ni lo tih a sawi. Tun thla chhunga ramri chungchanga buaina chinfel hman a nih theih dawn leh dawn loh pawh CM chhan tur a nih thu a sawi bakah, Assam sorkarin regional committe a dinten report an peih tawh em tih an hriat loh thu a sawi.

Chief minister Sangma chuan ramri chungchang hi Assam chief minister Himanta Biswa Sarma a sawipui leh hmain, state sorkar chuan stakeholder zawng zawngte chu consultative meetinga a neihpui leh phawt dawn tih a sawi a ni.