AFSPA chungchang ngaihtuahin Nagaland special Assembly session nei dawn

Nagaland sorkar chuan Mon district-a security force-ten civil mi 14 an kahhlum hnuah, an state chhungah sipai hnena thuneihna sang, Armed Forces (Special Powers) Act, 1958 (AFSPA) hman mek chungchang ngaihtuahin special Assembly session a buatsaih dawn. He session-ah hian AFSPA hlih phutna resolution pawh pass nghal tum a ni.

Special session hi December 20-a neih tura ruahman phawt a nih thu planning and coordination, land revenue and parliamentary affairs minister Neiba Kronu chuan a sawi.

Minister chuan Ningania state sorkar hnuaia e Core Committee on Naga Political Issue meeting-ah special session neih hi rel a nih thu a sawi. Core Committee hi chief minister Neiphiu Rio-a'n a ho a, cabinet minister-te bakah an state-a political party hrang hrang aiawhte an tel.

December 4-a Mon district-a Oting khaw bula security force-ten civil mi an kahhlum leh hemi hnua civil mi leh sipaite inkara buaina a chhuah hnuah, state sorkar leh political party bakah pawl hrang hrangten AFSPA hi na taka sawiselin, hlih an phut a ni. State sorkar pawh AFSPA hlih phutna resolution siam tura Assembly special session ko turin an nawr zui bawk.

AFSPA hi thil ṭullo a ni tih kan lantir a ngai : Nagaland CM
Nagaland chief minister Neiphiu Rio chuan Ningania Capital Cultural Hall, Kohima-a Oting-a civil mi kahhlumte sunna hun hmanah thu sawiin, he thil thleng hi sipaiten AFSPA an hman sualna lantirtu a ni, a ti.

CM Rio chuan AFSPA chu mihring dikna palzutna a ni a, kum tam tak Naga mipuite chuan lo dodal tawh tih a sawi. Sipaite pawikhawihna thlen chungchangah mipuite chu thinrim hle mah se, tharum thawhna thlen zawnga che lo turin a ngen a, AFSPA chu hman a ṭul lo tih India ram hnenah an lantir a ngai tih a sawi.

Chief minister hlui TR Zeliang pawhin AFSPA chuan civil mite natna leh tawrhna chauh a thlen a ni tiin, pawisawilo civil mite kahhlum an nih dan chu eng chhuanlam mah hmangin insawithiam theih a ni lo a ti a, sorkar chu pawikhawihtute hrem an nih ngei theihna tura a theih anga hma la turin a ngen bawk.

HRW-in AFSPA hlip turin phut
New York-a hmunpui nei, Human Rights Watch chuan AFSPA hnuaiah pawikhawihtu sipaite hum an nih tlat avangin, he dan hi hlip tura an phut thu an sawi.

International NGO hian December 4-a Nagaland-a sipaite kuta civil mi 14 thihna thleng chuan, India sorkarin he dan pawisawi tak hi a tihtawp a ṭulzia a tilang a ni, a ti.

HRW-a South Asia director Meenakshi Ganguly chuan, "India home minister leh Indian army-ten civil mite thihna thlen dan hi chhui chian tiam mah se, mawhphurtute thubuai siamsak an nih loh chuan an thil sawi hian awmzia a nei lo. AFSPA hian sipaite a hum tlat avangin he dan hi hman a nih chhung hian hetiang thil hi a la thleng fo ang," tiin a sawi.