Manipur University buaina in ziaawm lam pan lo ; Bandh in nunphung a tibuai

Manipur University buaina kalzelah Thawhlehni zanlai aṭanga MUSU in state pum huapa darkar 48 chhung bandh an huaihawt chuan nunphung a tikhaihlak hle.

Manipur University Stu­dents’ Union (MUSU) in Thawh­lehni zanlai aṭanga bandh an huaihawt hi pawl hrang hrang- Kangleipak All Manipur Students’ Union, Students’ Union , Apunba Irei­pak Maheiroi Singpang Lup, Democratic Students’ Alliance of Manipur, Manipur Students’ Federation, Kangleipak Students’ Association leh All Manipur Muslim Students’ Organisation te chuan an thlawp ṭha hle a ni.

Sumdawnna hmun hrang hrang khar a ni a, lirthei tlan hmuh tur pawh a awm loh bakah khawlaia chhuak pawh hmuh tur an vang hle a ni. Bandh huaihawttu te hian hmun hrang hrangah kawngpui an dang a, University kawng pawh Thawhlehni zan aṭang khan an dang.

State chhung hmun hrang hranga kawngpuiah meikhu leh meialh hmuh tur a awm nual bawk a ni.

MUSU president M. Da­ya­man chuan Univesity Vice Chancellor AP Pandey chhuah­tir chauh chu an lungawina tur a nih thu sawiin, chu chu zirlai, zirtirtute leh staff te pawhin an duh ber a nih thu a sawi.

VC chetdan chhuizui tur zirlai ten thawhpui duh lo

Union Ministry of human resources and development chuan Thawhlehni khan MU VC chungchang chhui tur fact-finding committee a din a, mahse university zirlaite leh staff te chuan an thawhpui duh loh thu an sawi.

Meghalaya High Court acting Chief Justice hlui T. Nandakumar chuan committee hi a kaihruai dawn a, UGC joint secretary J.K. Tripathi, deputy secretary, department of higher education leh HRD ministry aiawh Surat Singh-te chu he committee-ah hian an tel dawn bawk.

Chief Minister N. Biren Singh chuan Thawhlehni khan MUSU, Manipur University Teachers Association (MUTA) leh pawl dangte chuan an thawhpui a beisei thu a sawi a, chhui a nih chhung chuan Pandey pawh leave la hrih tura tih a nih thu a sawi bawk a ni.

Chief Minister chuan uni­versity buainaa zirlaite leh zirtirtute harsatna chu sorkar n pawi a tihpui thu sawiin, Prime Minister Narendra Modi, home minister Rajnath Singh leh HRD minister Prakash Javadekar-te chu an hmalakpuina avangin lawmthu a hrilh bawk.

Zirlai pawlte leh zirtirtute chuan Nilaini khan emer­gency meeting an nei a, Manipur police-ten tharum nasa tak hmanga zirlai nawrh huaihawt te an nawr chu an dem thu an sawi.

Zirlai pawl dang, North-East Forum for International So­lidarity chuan Nilaini khan uni­versity buaina chung­-changah hian HRD Ministry hnenah memo­randum thehlutin Pandey chhuahtir an duh thu an ziak.

Forum member Chinglen chuan VC chu inphahhniam se an duh thu a sawi a, amah chhui­zui tur committee pawh din ni mah se VC chuan thuneihna a chan chhung chuan an chhuina chu a dik dawn lo tih a sawi. Thuneitu ber a nih chhung chuan mipuite leh document te chu a thlakthleng thei a ni, a ti.

Forum hian University cam­pus aṭanga Assam Rifles camp sawnchhuah pawh an ngiat thu an tarlang bawk.

Manipur University co­mmunity pawhin Nilaini-a meeting an neihah fact-finding committee an thawhpui dawn loh thu an sawi.

Zirlaite laka tharum thawhtu police pahnih suspend

Manipur University vice-chancellor, Adya Prasad Pandey chhuahtir duh vanga nawrh huai­hawtnaa zirlaite lakah kutthlaktu police pahnih chu suspend an ni.

Police te nen an innawr buainaa a tluk avanga a bana truck in a chil hliam Shital Oinam chu N. Biren Singh chuan Ningani khan a dam­dawi­inah a tlawh nghe nghe.

Heng an suspend te hi sub-inspector leh head constable an ni.

State chhungah Internet block

Manipur state Home De­partment chuan state chhunga buaina nasa tak thlengah social media leh internet lama thuthang dik lo darh tur venna atan internet block tura thupek Ningani khan an tichhuak.

Vanglaini palaiin Manipur-a Medical zirlai pakhat a zawhchiannaah Zirtawpni zing aṭang khan Internet hi block a ni a, broadband erawh block a ni lo a niin a sawi a, Mobile Internet erawh hman theih a nih loh thu a sawi.

Home department thu­chhuah chuan Internet hi ni nga chhung block tur a nih thu an tarlang a, telecom service provider te chu voice call tih loh chu block vek turin an hriattir a ni.