Nagaland-ah mipuiten Amit Shah leh Indian army lim an hal

Nagaland-a Mon district-a Tizit civil society-te buatsaihin Inrinni khan Tizit khaw mipuiten security force-ten civil mi 14 an kahhlum avanga lungawi lohna lantirin kawng an zawh a, kawngzawhte hian Assam-Nagaland border gate bula hun an hmanah Amit Shah leh Indian Army lim an siamte an hal.

Tizit khaw mipuite hian Armed Forces (Special Powers) Act (AFSPA) hlip turin sorkar laipui an phut bawk.

Mipui pungkhawmte chuan sipaite an demna thu te, rorelna dik an duh thu an aupui bakah, union home minister Amit Shah chu Nagaland-a thil thleng chungchanga sawinaah dawt sawiah an puh bawk. Amit Shah hian sipaite hian civil mite chuanna motor hi ding tura an tih hnuah a din duh loh avangin an kap ta niin a sawi a ni.

AFSPA hlih phutna online petition-in thlawp a hlawh
Nagaland-a sipaite kut tuara civil mi 14 an thih hnuah, Kohima-a cheng kum 27 miin sipaite thuneihna sang pekna, AFSPA hlih phutna online petition a siam chuan thlawp a hlawh hle.

He petition hi change.org ah December 6 khan a siam a, nimin thleng khan mi 93,000 chuangin an sign tawh.

Petition siamtu hi freelance writer Rosang Pongener a ni a, Mon district-a sipaite pawikhawihna rapthlak tak a thlen hnuah a tih theih ve nia ngaiin he petition hi a siam a, hei hi Naga mipuiten aw an chhuahna hun nia a ngaih thu a sawi.Democracy ramah AFSPA awm chu a tul lo nia a ngaih thu leh, hei hi Naga mipui tam ber ngaihdan pawh a nih thu a sawi bawk.

Hmarchhak bial hi pratice ground a ni lo : Konyak Union
Konyak Union AFSPA enchhina hmun atan hmachhak bial hman a ni tur a ni lo tih an sawi.

Inrinnia Mon-a press conference an neiha, KU thupuangtu Yingphe Konyak chuan AFSPa chu mi nghaisak, pawngsual leh thah theihna dan a ni, a ti. Union home minister Amit Shah-an Parliament-a Nagaland-a pawi khawihna thleng chungchang a sawi chhuah dan chu thil zahthlak tak a ni a, khaw en laia sipaiten hel emaw tia civil mite an hai chu thil mak a ni, a ti. Sipaiten civil mite an kahhlum hnua hel anga lantir tuma an thawmhnaw thlaksak an tum chungchangah, eng danin nge an mi thahte thawmhnaw thlaksak phalsak tih a zawt nghal bawk.

Union minister-te chu Konyak hnam leh Naga mipuite hnena ngaihdam dil tur leh, Amit Shah pawh Parliament-a a thusawi sut turin Konyak Union chuan an phut a ni.