NESO-in CAA duh lohna lantirin Black Day hmang

Hmarchhak biala zirlai pawl hrang hrang intelkhawm, North East Students' Organisation (NESO) chuan Citizenship (Amendment) Act (CAA), 2019 duh lohna lantirin, Inrinni liam ta December 11 khan hmarchhak bial pumah Black Day an hmang.

NESO chairman Samuel B Jyrwa chuan nikum khan an pawl chuan December 11 hi hmarchhak biala Black Day-a hman turin an lo puang tawh tih a sawi.

Jyrwa chuan, "Hmarchhak bial mipuiten nasa taka kan dodal chungin sorkar laipui chuan Citizenship Amendment Bill, 2019 chu Rajya Sabha kaltlangin December 11, 2019 khan dan sakei siamna turin a pass lui tho a ni. Hmarchhak mipuiten he dan hi kan duh lo tih sorkar hriattina atan he hun hi kan hmang a ni, " a ti. Black Day chu mipuite hnenah sorkar laipuiin hmarchhak leilung fate pawi a khawih dan hriatnawn tir lehna atan hman a ni bawk a ni, a ti.

NESO adviser Samujjal Bhattacharya chuan, "Hmarchhak leilung fate thinlungah CAA duhlohna hi a la inmung reng a ni. CAA hi sut a nih hma chu kan ngawi mai dawn lo," tiin CAA dodalna chu hmarchhak state-ah kalpui chhunzawm zel a ni dawn tih a sawi.

NESO-ah hian hmarchhaka zirlai pawl pariat - All Assam Students’ Union (AASU), All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU), Naga Students’ Federation (NSF), Twipra Student Federation (TSF), leh All Manipur Students’ Union (AMSU) te an tel a ni.

Assam-a rally neihnaah AJP leh police innawr buai
NESO-in Black Day an puan zawm a, CAA duh lohna lantirtu, Assam Jatiya Parishad (AJP) member leh police-te an innawr buai.

AJP member-te hian Guwahati-a Uzanbazar area-a Shaheed Bhawan-a NESO in Black Day an hman chu an zawm a, a hnuah flag dum nen kawng zawhin CAA lem a siam chu an hal a ni. AJP member kawng zawhte hi police-te chuan dan an tum a,an innawr buai a ni.

AJP hotu Lurinjyoti Gogoi chuan CAA dodalna hi tharthawh lehin, he dan hi sut tura sorkar phutin nawrh an huaihawt chhunzawm zel dawn tih a sawi a ni.