Nagaland: Sipai kahhlum chhungten zángnadawmna dawng duh lo ; Civil mite kaphlumtu sipaite hremna pek phawt an phut

Nagaland-a Mon district-a December 4-a sipaiten an kahhlum, civil mi 14 chhungte chuan pawikhawihtu, sipaite chu hremna pek an nih hma leh, Armed Forces (Special Powers )Act (AFSPA) hlih a nih hma chuan eng sorkar hnen aṭang mahin zángnadawmna an dawng duh lo tih an sawi.

He thutlukna hi Pathiannia Oting khuaa tualchhung mite leh mitthi chhungten meeting an neihah an siam a ni. Civil mi 14 thi zinga 12-te kha Oting khaw mite hi an ni.

Oting village council chuan thuchhuah siamin, minister leh district deputy commissioner-ten mitthi chhungte hnena pek tur, Rs 18,30,00 dahna envelope an pek thu an sawi. Hei hi minister Paiwan Konyak-a'n mitthi chhungte a tawrhpuina lantirna atana a pek niah an lo ngai a, mahse a hnuah heng pawisate hi state sorkarin zángnadawmna a pek tur, installment-a a pek tum a ni tih an hriat leh avangin an dawng duh loh tih an sawi. Civil mite kaphlumtu, 21st Para Commando-te chungah rorelna dik lantir a nih hma leh, hmarchhak bial pum aṭanga AFSPA hlih a nih hma chuan zangnadawmna hi an dawng dawn lo tih an sawi a ni.

Nagaland sorkar chuan sipaite kut tuara thi, civil mi 14 chhungte hnenah zángnadawmna cheng nuai 5 ṭheuh pek a tiam a, hliam tuarte hnenah Rs 50,000 ṭheuh pek a tiam bawk.

Rights body-in AFSPA sût turin phut
Nagaland-a security force-ten civil mite ambush a, mi 14 an kahhlum hnuah sipaite hnena thuneihna sang pekna, AFSPA chuan sawisel a hlawh zui nasa a, he dan hi sût tura phuttu pawh an pung zel.

Civil mite laka pawikhawihna a thlen hnuah Nagaland bakah ram chhung hmun dangah pawh pawl leh political party, political leader-ten AFSPA hi hlip turin sorkar an phut a, he dan duh lotu zingah hian Nagaland chief minister Neiphiu Rio leh Meghalaya chief minister Conrad K Sangma-te pawh an tel.

Working Group on Human Rights (WGHR) pawhin he dan sawisel hlawh tak hi sut turin a phut ve leh bawk. Right body chuan kum 2022-ah UN Human Rights Council (UNHRC)-ah India human rights record hi ennawn a ni leh dawn a, he hunah record ṭha zawk a neihna turin AFSPA sut hi thil ṭha tak a ni, a ti. Civil mi kahhlum chhungte an tawrhpui thu sawiin, WGHR chuan tun ṭum hi AFSPA hnuaia mihring dikna chanvo palzutna nasa tak a thlen vawi khatna pawh a ni lo tiin an thuchhuahah an tarlang a ni.