Assam-a CAA dodalna lantirnaa nunna chante zahna hlan

Assam-a kum hnih liam taa Citizenship Amendment Act (CAA) dodalna lantirnaa buaina chhuaka nunna chan, mi pangate hriatrengna hun chu Pathianni khan Assam-a pawl hrang hrangten an hmang a, heng mi pangate hi zahna an hlan a ni.

Hriatrengna hun hi nunna chan zinga pakhat, Sam Stafford-a chenna Hatigaon-ah leh Guwahati playground-ah hmangin, he huna kalkhawmte chuan CAA dodalna lantir chhunzawm zel an intiam nghal bawk.

Kum 2019-a Parliament-a CAA pass a nih hnuah he dan dodalna huaihawttu hmasa zinga mi, Krishak Mukti Sangram Samiti (KMSS) chuan nunna chantate thlalak hmaah zahna pangpar dahin, KMSS hruaitu leh Sibsagar MLA Akhil Gogoi chuan political party leh nationalist organisation-te chuan CAA duh lohna movement hi kalpuiin hma an hruai a ngai a ni, a ti.

All Assam Students’ Union (AASU) chief advisor Samujjal Kumar Bhattacharya chuan anti-CAA movement hi a thawm reh deuh hman mah se a la tawp lo a, zirlaite exam neih chhoh leh hri leng vangin a hma angin an kal vung thei lo mai chauh niin a sawi. Mahse kum 2019-a an beih ang khan an thapui thawhin he dan sut tura sorkar laipui phutin an che chho leh dawn tih a sawi a, he dan dodalnaa nunna chantate inpekna a thlawna liam tir mai an tum lo tih a sawi.