Assam-a school 46,000 chuangte dinhmun enfiah dawn

Assam sorkar chuan nakkum aṭangin an state-a school 46,000 chuangte dinhmun a enfiah dawn.

Pathiannia chief minister Himanta Biswa Sarma kaihhruaia meeting-ah, 'Gunotsav' exercise hnuaia school hrang hrangte enfiahna kalpui dan tur hi an sawiho a ni. School enfiah hna hi thawh hniha kalpuiin, a thawh khatna chu April 5-7 ah neih a ni ang a, a thawh hnihna hi April 20-22 ah neih a ni ang.

School enfiah tur hian sorkar, provincialised leh tea-garden managed school 46,251 a huam dawn a, heng school-ah hian zirlai 42,51,524 an awm a ni.

Gunotsav exercise hnuaiah hian elementary education quality ṭha zawk siam dan tur te duangin, zirlaiten co-scholastic activitiy hmanga thiamna an neih theih dan tur, community participation an neih dan turte a ngaihtuahpui dawn a ni.