CAB thlawpa vote thlak vangin NPF-in an party MP suspend

Naga People's Front (NPF) chuan an party MP, Rajya Sabha member KG Kenye chu nikum December 11-a Parliament-a Citizenship (Amendment) Bill (CAB) ngaihtuah a nih ṭuma bill thlawp lama vote a thlak avangin party member a nihna aṭangin a suspend. 

NPF president Dr Shurhozelie Liezietsu chuan Nilaini khan party member aṭanga MP Kenya suspend-na thupek hi tichhuakin, CAB chungchangah party duh dan kalh zawnga a chet avangin hrem a ni tih a sawi. Liezietsu chuan he thutlukna hi NPF disciplinary action committee duh dan anga ti an nih thu a sawi bawk. 

CAB thlawp lama vote a thlak avangin nikum December 19 khan NPF disciplinary action committee chuan MP Kenye hi hriattirna pein insawifiah turin a lo ti tawh a. A insawifiah hnuah committee chuan Kenye insawifiahna hi pawm loin, party member a nihna paihsak a rawt ta a ni.

Kenye hian an state-ah Bengal Eastern Frontier Regulation, 1873 hnuaiah inner line permit (ILP) system hman a nih avang leh, CAB hian ILP hmanna a huam tel loh avangin an state tan a pawi lo turah ngaiin a thlawp ta niin a insawifiah. 

Disciplinary action committee chuan an party-in CAB duh lohna resolution hi nikum January 1 khan a lo siam tawh tih sawiin, heti chunga Parliament-a a thlawp lama vote a pek avangin Kenye bakah Manipur Lok Sabha member Lorho S Pfoze pawh show-cause notice a pe tawh bawk. Pfoze chuan party hnenah hian CAB thlawp lamah a vote avangin ngaihdam a dil tawh.

Kenye hremna thupek an siamah, NPF chuan, "CAB/CAA thlawp lama i vote chhanah chhuan­lam hrang hrang nei mah la, he bill chungchangah party dinna chu a ngai reng a, tun thlengin a ngai reng a, CAB/CAA hi a dodal chhunzawm zel dawn a ni," a ti. 

NPF chuan, Parliament-a MP Kenya thiltih dan chu eng kawng mahin an party duhdan leh ngaihdan a ni lo tih a tarlang a ni.