Manipur-a Naga organisation-ten AFSPA duh lohna lantir ; PM Modi hnenah joint memorandum an thehlut

Manipur-a Naga organisation-te chuan Decmeber 4-a Nagaland-a security force-ten civil mi 14 an kahhlum an demna lantirin, sipai hnena thuneihna sang pekna Armed Forces Special Powers Act (AFSPA), 1958 hlih phutna joint memorandum chu prime minister Narendra Modi hnenah an thehlut nghal bawk.

Joint memorandum-ah hian United Naga Council (UNC), Naga Women Union (NWU) leh All Naga Students' Assocation, Manipur (ANSAM) ten an hming an ziak a ni. Naga pawl hruaitute chuan joint memoradum hi online-in an thehlut phawt a, a hard copy chu 'speed post' in an thawn dawn bawk tih an sawi.

Manipur-a Naga chenna, Naga district headquarters zawng zawngah Oting khaw mi Naga ṭhalai 14-te kahhlum an nih avanga lungawi lohna hi lantir a lo ni tawh bawk.

Mon district-ah sipaite luh phal lo
Konyak Naga tribe pawl, Konyak Union chuan civil mite thattu, sipaite chungah rorelna dik tak lekkawh a nih hma chuan Mon district-a sipai convoy luh leh patrolling an neih phal lo tih an sawi.

Thuchhuah an siamah, Konyak Union chuan Konyak village council zirlai pawl leh pawl dang reng reng pawhin sipaite hnen aṭangin puihna emaw, chhawmdawlna emaw engmah an la tur a ni lo an ti bawk. Mon district chhungah military recruitment rally buatsaih an khap bawk a ni.

District chhung mipuite chuan Indian Military Force nena inzawmna an neih reng reng an titawp vek tur a ni tiin, military base camp siamna turin an ram hman phalna pawh an pe tur a ni lo, an ti. Motor-ah flag dum tar vek tur leh, mipuite pawh badge dum bel vek turin an ngen a ni.

Sipai hotu hluiten ngaihdam dil turin Army an phut
Nagaland-a pawisawi lo civil mite thah an nih chungchanga Indian Army chu ngaihdam dil turin deputy chief of army staff hlui pahnih - Lieutenant General Zameer Uddin Shah leh Lieutenant General Raj Kadyan-ten an phut.

General Shah chuan civil mite kahhlum an nih dan chu thil hriatsual palh vang a ni a, Naga mipuite thinurna tihnep phah dawn kher loh mah se an tihsual palh avang hian sipaite chuan ngaihdam an dil ngei tur nia a ngaih thu a sawi. General Kadyan pawhin Oting khaw bula beihpui an thlaknaa hriatsual vanga civil mi chuanna motor an kah chungchangah ngaihdam dil kher lo mah se, a hnua mipui lungawi lo pungkhawmte hnawhdarh tuma silai an hmehpuah chungchangah erawh ngaihdam an dil tur a ni tiin, "Corp Commander chu ni ila ngaihdam ka dil ngei ang," a ti.