LSU in ILP system siamṭha turin Nagaland sorkar nawr
Nagaland-a Lotha Students Union (LSU) chuan Nagaland sorkar hnenah an state-a pem lutte enfiah hna khauh zawka kalpui a nih theihna turin Inner Line Permit (ILP) system hman mek chu siamṭha turin an nawr.
LSU chuan state sorkar hnenah ILP regulation guideline chu siamṭha a, dan loa an state-a lutte enfiah hna khauh zawka kalpui tur te, investor leh tourist-te tana ILP dil dan awlsam zawka siam tur te, langtlang leh rintlak zawka ILP revenue collection kalpui tur te leh, online database system hmanga record mumal leh fel tak siam turin an phut.
Chief Minister Neiphiu Rio hnena ngenna an thlenah, LSU chuan ILP system an hman mek chu felhlel tam tak a awm a, hei vang hian dan loa luh tumte pawhin he system fel tawk lohna hi remchangah hmangin dan loa lut an tam phah niin an sawi.
Zirlai pawl hian CM hnenah “Reform Recommendations” telna document pawh an thehlut nghal a, hetah hian he dan siamṭhat leh kalpuina tura rawtna chi hnih an neihte an telh a ni.
CM hnena rawtna an thlenah hian zirlai pawl chuan Mizoram-a ILP system hman mek zulzuia Nagaland tana ILP guideline siam thar an rawt a, a bikin Bangladesh aṭanga luh tuma diltute endikna khauh zawk siam an rawt a ni. Hei bakah hian state sorkar chu ILP system thar hi thuneitute leh police-ten dan an kenkawhna kawnga thuam chakna turin technology thar hmanga siam turin an phut bawk. Crime and criminal tracking network and systems (CCTNS) hmanga state pawn lam aṭanga pem lutte thiltih thlithlai leh enfiah theihna tur siam turin an phut a, hemi hmang hian thuneitute leh police-te chuan ILP diltu leh phalna an pekte criminal record an enfiah thei dawn a ni, an ti.
Zirlai pawl chuan khualzinte tan awlsam zawka online hmanga ILP an dil theihna tura online ILP portal siam turin an ngen bawk a ni.