Assam NRC draft objection file hun kan siam ang : Rajnath Singh

24th July, 2018

Union Home Minister Rajnath Singh chuan Pathianni khan Assam-a National Register of Citizens (NRC) chu draft chauh a nih thu leh mipuite chu objection file theihna hun an siamsak dawn tih a sawi.

Assam NRC Draft hi July 30-a tlangzarh tura ruahman a ni a, minister chuan NRC chu Assam accord August 15, 1985 zulzuia kalpui a nih thu a sawi a, draft list siamna kalpui a nih dan zawng zawng pawh Supreme Court in in ti tura a tih ang zela kalpui a nih thu sawiin SC lam hian an enfiah reng tih a sawi a ni.

NRC hi Assam-a dan loa lutte hriat theihna tura tih a ni. Supreme Court chuan June 30-a draft list tlangzarh tura thupek a lo chhuah tawh chu Assam-a tuilen nasat avangin July 2 khan July 31 thleng a lo pawhsei sak tawh. Hei hi sorkar mai bakah state coordinator-te pawhin an pawm vek a, July 30 hi chuan NRC draft list vawihnihna hi tihchhuah ngei a nih rin a ni a, nikum December 31 zanlaiah khan draft list hmasa zawk hi tihchhuah a ni tawh thung a ni.

Rajnath Singh chuan NRC chu langtlang tak, hleih nei lo leh fimkhur taka kalpui a ni dawn tih a tiam thu a sawi. Stage tinah fimkhur taka kalpui a nih thu sawiin tihdan tur kalphung siamsa leh dan an zawm vek thu a sawi bawk.

Singh chuan mi zawng zawngin an dikna chanvo an neih vek theihna tura hma an lak dawn thu a sawi a, mi zawng zawng angkhat veka an en dawn thu a sawi. Dan hnuaiah chuan mi zawng zawngin dikna chanvo inang vek an nei dawn a ni, a ti.

Minister chuan draft tihchhuah a nih hunah pawh objection file-na hun hi mi zawng zawng tan pek a nih dawn thu a sawi. Objection file awm reng reng chu uluk taka an zirchian dawn thu leh, heng zawng zawng hi chinfel vek a nih hunah NRC chu tlangzarh chauh a nih dawn thu a sawi.

Union Minister chuan Citizenship Rule hnuaiah NRC-a lawmlohna nei chuan Foreigners Tribunal hnenah an appeal thei dawn tih a sawi bawk. Hetianga hma an lak chuan NRC tlangzarh a nih hunah pawh sawiselna a awm dawn lo a ni, a ti.

Rajnath Singh chuan hlauhna tur leh chiaina tur a awm loh thu sawiin, tumah tihduhdah an phal dawn loh thu a sawi, sorkar laipui chuan a theih ang angin Assam sorkar ṭanpui an inhuam thu a sawi bawk a ni.