State te sorkar rorelna ṭhat dan list tichhuak ; Nagaland, Manipur leh Meghalaya a tawpah awm

Public Affairs Centre (PAC) in Public Affairs Index 2018 a tihchhuahah Kerala chu ramchhunga sorkar rorel ṭhatna ber (best governed state)-ah thlan a ni.

Hetihlai hian state te (mihring vaibelchhe hnih awm tlin lohna) zingah Himachal Pradesh chu pakhatnaah a awm a, Goa, Mizoram, Sikkim leh Tripura in an dawt.

Hmarchhak state pathum Nagaland, Manipur leh Me­ghalaya te chu state te zingah pawh hian list-ah a mawnglam an hauh pha ṭawk a ni.

Inrinni chawhnu-a PAI 2018 tlangzarhnaah hian Bengaluru-based PAC chuan Kerala chu Public Affairs Index (PAI) 2018-ah hian an sang ber tih tarlangin, 2016 aṭang khan kum thum chhung a zawnin he dinhmun hi an hauh tawh tih an tarlang.

PAI list hi PAC hian kumin hi kumthum an tihchhuahna a ni.

Public Affairs Index hi category hnihah ṭhen a ni a, state lian leh state te-a ṭhenhran a ni a, mipui awm zat azirin ṭhenhran a ni. Mi vaibelchhe hnih aia tlem awmna state chu state teah chhiar an ni a, vaibelchhe hnih aia tam awmna chu state lian list-ah dah an ni thung.

Think tank PAC hian state endikna theme 10 an nei a, chung zingah chuan infrastructure mamawh ang an neih leh neih loh te, human development lam an thlawp ṭha tawk em tih te, social protection, hmeichhia leh naupang him dan bakah dan leh thupek kawnga state dinhmun te a tel a ni.

Naupang dinhmun ṭhatnaah hian Kerala, Himachal Pradesh leh Mizoram chu a sang pathum an ni bawk.

PAC hi 1994-a din niin Indian economist leh scholar Samuel Paul-a din a ni a, 2016 aṭang khan PAI list hi an tichhuak ṭan a ni.