Nagaland-ah sipai laka lungawi lohna lantirtu pung zel

Nagaland-a security force-ten civil mi 14 an kahhlum avanga sipaite laka lungawi lohna lantirtu an pung zel.

Konyak Naga tribe pawl lian ber, Konyak Union-in civil mite kaphlumtu hremna pek an nih hma chuan sipaite thawhpuina titawpin, Mon district-ah sipai convoy luh leh patrolling an neih an khap a, hei bakah hian tualchhung mipui sipaite thawhpuina neite pawh titawp turin an ti bawk a ni.

Hemi hnu hian Eastern Nagaland Peoples' Organisation (ENPO) pawhin non-cooperation movement kalpuiin, Eastern Nagaland area-a chengte chu army civic programme-ah an tel dawn lo a, official programme an neihah pawh tel loin, an bial huam chhungah recruitment drive buatsaih an khap bawk. Eastern Nagaland area hian Mon, Tuensang, Longleng leh Kiphire-te a huam a ni.

ENP chuan Eastern Nagaland-a civil society hrang hrangte consultative meeting an neihpui hnuah, an thil phut tihhlawhtlin a nih hma chuan sipaite thawhpui tawh loh hi an rel a ni. Hei bakah ram pum huapa thil lawm ṭhin pawh engmah buatsaih ve loh an rel bawk a, heng zingah hian Independence Day leh Republic Day-te pawh a tel a ni. Thuchhuah an siamah, ENPO chuan December 4 leh 5-a Mon district-a civil mi 14 kaphlumtu sipaite chu thubuai siam sak a, civil court-ah an chungthu ngaihtuah an phut. Hei bakah hian Parliament-a union home minister Amit Shah-a'n Nagaland-a pawikhawihna thlen dan chungchang a sawi dan sut tur leh, Nagaland-a sipai thuneihna sang pekna, Armed Forces Special Powers Act (AFSPA) hman mek chu hlih an phut bawk.