AP: West Kameng-ah CrPC Section 144-na hmang

Arunachal Pradesh-a West Kameng deputy co­mmissioner chuan Thawhṭanni khan an district huam chhungah CrPC Section 144-na hman a nih thu a puang.

Students United Move­ment of All Arunachal’s (SUMAA) ten Tibetan Re­ha­bilitation Policy, 2014 an duh lohna lantirna thawh hnihna nimin aṭang khan neih an tum a, hemi avang hian CrPC Section 144 hi West Kameng huamchhungah hman a nih tur thu DC hian a puang ta a ni.

Criminal Procedure Code (CrPC) Section 144 hnuai­ah hian hmun khatah mi pali aia tam awmkhawm phal loh a ni a, he dan hi district chhung hmun hrang hrangah Thawhṭanni aṭang khan hman ṭan a ni ta a ni.

July 13 khan SUMMA hian West Kameng district-ah hian Tibetan raltlan an duh lohna lantirna kawngzawh an lo nei tawh a, Tibetan raltlan te hian trading license lem, permanent residential certificate leh Scheduled Tribe (ST) certificate lem te chu an refugee card bakah an nei niin an sawi.

SUMAA hian Tibetan raltlante hming chu district 14-a thuneitute hnenah hian enfiah turin an thehlut nghe nghe a, heng an hming thehluh te hian dan loin ST certificate, trading license leh permanent residential certificate-te an nei niin an puh a ni.

Hemi anih avang hian SUMAA hian July 17 khan meeting neiin nimin aṭanga Tibetan raltlan te duh lohna lantirna thawh hnihna hi nei turin thutlukna an siam ta a ni.

Hetih lai hian Bom­dila-a business commu­nity te chuan DC hnen­ah hian SUMAA hi hekin an community-ah pawikhawihna, dawr khar luihtirna bakah mipuite-ah hlauhna te an thlen niin a an puh ve thung.

SUMAA hian an puhna hi phain July 21 khan Itanagar-ah press conference an ko a, district thuneitute chu ni 15 chhunga an hming thehluhte hming leh chawrchhuahna te hrehciang turin hun an pe tih an sawi. Nimin aṭanga dodalna lantir an tum avang hian dan leh thupek kenkawhna lama harsatna an tawh loh nan district thuneitute chuan CrPC Section 144 hi an puang ta a ni.