Manipur University buaina: Police leh zirlaite innawr buai leh

Manipur University buaina chu chinfel a la nih loh avangin ziaawm lam a la pan thei lo a, sorkarin vawiin thlenga a chinfelna a la siam loh avang leh thubuai a la rem loh avang­in Thawhṭanni pawh khan University Vice Chancellor duh lotu te leh police-te an innawr buai leh.

Kar liamta lawkah khan MU Vice Chancellor, AP Pandey chhuahtir tura nawrtute leh po­lice-te innek buai­naah mi eng emaw zatin hliam an tuar a, damdawi-in panpui hial te pawh an awm a, heti chung hian buaina hi chinfel a la ni lo a ni.

Thawhṭanni khan Manipur Assem­bly Se­ssion neih laiin Thangmeiband area-ah police-te leh VC duh lohna lantirtute nasa takin an innawr buai leh a, VC duh lotute hi a tam zawk chu zirlaite an ni tih report chuan a tarlang a, zirlai te bakah hian anmahni thlawptu mi eng emaw zat an tel bawk.

Buaina chhuak tharah hian hliam an awm erawh report a ni lo thung.

Manipur Assembly Session ni hnuhnung berah Congress MLAs K Govindas Konthoujam leh K Ranjit te chuan Manipur University buaina chungchang hi an sawichhuak a, House speaker chu a chinfelna zawng turin an nawr. University buainaah hian zirlaite chu zirtirtu, staff te bakah civil society organization eng emaw zatin an thlawp bawk avangin sorkar laipui chu a chinfelna zawng tura nawr turin an ti a ni.

House speaker Y Khemchand chuan Congress MLA-ten reso­lution siam tura an nawrna chu a hnawl thung.

Education Minister Th. Radhe­shyam chuan Congress MLA-te calling attention motion putluh chu chhangin an theihtawp an chhuah thu leh buaina chinfelna tur an zawn mek thu a sawi. Deputy Chief Minister Y. Joykumar pawhin MUTA te chu a hmuh tawh thu leh buaina chinfel dan tur chungchang a sawipui thu a sawi bawk.

Chief Minister N. Biren Singh, house leader ni bawk pawhin Manipur University buaina chinfelna tur chu a kaihhruai sorkar chuan an zawn mek thu a sawi ve bawk a ni.