Meghalaya MPSC: Mi 4 man, pawikhawihna tura sum pek an ni

Meghalaya Public Service Commission (MPSC) building petrol bomb hmanga beihna thubuai kal zelah East Khasi Hills district Police-te chuan mi pali an man.

Police-te hian Pathianni khan mi pasarih an khawm tawh a, thu an zawhfiah hnuah midang pathum hi chu chhuahin mi pali hi an hreng zui a ni.

Heng an min hren zui te hian pawi an khawih ngei a ni tih finfiahna ṭha tak an neih thu police-te chuan sawiin pawikhawihnaa a hnarkaitu bera ngaih mi pakhat an la zawn mek thu an sawi.

EKH Superintendent of Police, Davis NR Marak mi pakhtain building chhunga pertrol bomb a tihpuah lai hian midangin an lo veng tih a sawi bawk.

A pathumna chuan pawikhawih tura kalchhuak te pahnih tlanbo pui nghal an nih theihna turin van-ah a lo nghak tih a sawi a, a palina chuan heng pawikhawihtu mi pathum hnenah hian pawisa a pe tih a sawi a, bomb tipuak tura building-a kal pahnihte hi cheng 18,000 pek an nih thu Marak chuan a sawi.

Marak chuan a pangana chu an zawn mek thu sawiin an mi zawn mek hi pawikhawihna tur engkim ruahman tu a nih thu a sawi a, pawikhawih nan hian cheng 50,000 a pechhuak tih an hriat tawh thu a sawi bawk.

An man mi pali te hi Thawhṭanni khan court-ah hruai a ni a, ni 10 chhung police kutah an awm phawt dawn a ni.