Naga zirlai pawlin AFSPA hlih phutin rally huaihawt dawn

Naga Students' Federation (NSA) chuan vawiin hian an state aṭanga Armed Forces Special Powers Act (AFSPA) hlih phutin Kohima-ah rally pui tham tak an huaihawt dawn.

Rally neih turah hian mipuite tel an ṭhathnem hle rin a ni a, Old MLA Hostel Junction-ah hun hmangin, heta ṭang hian Raj Bhavan thleng kawng an zawh dawn a, sorkar laipui hnena thehluh turin Governor Jagdish Mukhi hnenah AFSPA hlip nghal tura phutna memorandum an hlan ang.

December 4 leh 5-a Mon district-a Oting khuaa sipaiten civil mi 14 an kahhlum avangin state chhungah lungawi lohna lantir a lo ni fo tawh a ni.

NSF president Kegwayhun Tep chuan AFPSA duh lohna lantirna hi an state-a rally huaihawt tawha a pui ber nih tir an tum tih sawiin, zirlai pawl hrang hrang bakah civil society-te pawh tel turin an sawm. Class 10 chin zirlaite chu an uniform nena kawngzawhnaah hian kal vek tura chahin, zirlai ni lote chu an hnam thuam inbel turin a ngen bawk.

Kegwayhun Tep chuan NSF aiawhte chuan pawikhawihna thlenna hmun, Mon district ami pawh an tlawh tawh tih sawiin, AFSPA hlih a nih hma chuan theihtawpin sorkarin an nawr chhunzawm zel dawn tih a sawi.

Rally neih tur buaipuitu, organising committee convenor Vipopal Kintso chuan Naga mipuite chuan he dan sakei, sipaiten mipuite hnuaichhiahna atana an hman hi an ning takzet tawh tih a sawi. "Naga mipuite mihring pawh ni ve lo ang maia an enna hian eng chen nge a awh dawn? Oting khuaa pawikhawihna thleng kha sorkar laipuiin harhchhuahna atana a hman ngei kan beisei a ni," a ti. AFSPA vang hian Naga mipuite'n an tuar nasa tawh a, tam tak chu report loin a awm a ni, a ti.

Kintso chuan Naga helpawl leh sorkar laipuiten inkahhai puanna tur inremna an siam hnuah AFSPA hi hlih a nih ngei mipuite pawhin an lo beisei a, mahse tun thlenga sorkar laipuiin he dan a la hlip duh loh chuan Naga buaina chinfel duhna tak tak a neih loh zia a tilang a ni, tiin a sawi bawk.

Kawngzawh an huaihawt tur hi mipuite tana harsatna thlen lo thei ang bera kalpui an tum tih committee member Neizovotuo Belho chuan a sawi a, zirlai exam nei mekte an awm a, chungte tan harsatna siam an tum lo a, office kal turte pawh tihbuai an tum lo tih a sawi.