Garo mipuiten Assam-Meghalaya ramri buainaah Parliament inrawlh an phut

Assam leh Meghalaya sorkarten state ramri buaina chungchang chinfel an tumna chu Garo hnam chenna khaw pasarihte chuan an pawm dawn lo tih sawiin, Parliament a inrawlh an phut.

Nilainia Garo khaw hrang hrang aiawh inhmukhawmte chuan thuchhuah siamin, "Assam aṭanga Meghalaya state dinna tur hian Parliament chuan Assam Re-organisation (Meghalaya) Act 1969 leh Northeastern Areas Re-organisation Act 1971 a lo pass tawh a, Assam Reorganisation (Meghalaya) Act 1969-a Section 3 (i)-a subsection (i) leh (ii) ah ramri chungchang pawh chiang taka tarlan a ni. Hei vang hian hemi bak ramri siam danglam tumna a awm chuan Parliament a inrawlh ngei a ni," an ti. Assam chief minister Himanta Biswa Sarma hnenah an thutlukna chungchanga memorandum an siam pawh an pe nghal bawk.

Assam-a Kamrup leh Goalpara district huam chhunga Garo khaw hrang hranga cheng, mi nuai 4.5 vel chuan Assam lama awm an duh a ni. Garo hi Meghalaya-a hnam tam ber dawttu an ni a, mahse hetichung hian ramri hrula cheng tam tak hian Assam lama beh an duh zawk a ni.