Tripura-a Tribal Council-in police force hran siam dawn

Tripura Tribal Areas Autonomous District Council (TTAADC) chuan police force hran siam a tum. TTAADC hian Tripura state pum hmun thuma ṭhena hmun hnih a huam a ni.

Tribal council chairman Jagadish Debbarma chuan ADC Police Bill hi pass a nih hmain TTAADC session-ah ni 10 vel tal sawiho a ni phawt dawn tih a sawi.

Kum 1994 khan Congress-TUJS-ten thuneihna an chan laiin council tan a hrana police force dinna tur resolution an lo pass tawh a, an rawtna hi Governor hnenah an thawn a ni. Kum 2007 khan Governor chuan Bill hi a pawm a, mahse harsatna hrang hrang avangin hma an la chhunzawm ta rih lo a ni.

Debbarma chuan session-a sawiho a nih hnuah, tribal council chuan rules buatsahin hei hi council-ah pass turin pharh a ni ang, a ti. Pass a nih hnuah ADC chuan police hi a la thei tawh dawn tih a sawi bawk.

TTAADC din a nih tirh aiin tuna a bial huam chhunga tribal awm zat chu an tlahniam tawh tih Dabbarma chuan a sawi. Kum 1985-a TTAADC din a nih khan tribal awm zat chu 88% a tling a, tunah chuan 84% an ni tawh a ni. Hetih lai hian non-tribal population erawh a pung thung a, a tira 14% khan tunah chuan 16% an awm tawh a ni.