Kuminah Agartala-Akhaura railway project zo dawn
India leh Bangladesh inkalpawhna tur project pawimawh tak, Agartala-Akhaura rel kawng siam hna chu kumina zawh fel a, hman theih tura peih fel tum a ni.
Customs leh immigration building sak hna chu thawh mek a ni a, November thlaah chuan zawh hman tum a ni. Rel kawng siam mekah hian Bangladesh lam chin, km 6.25-a thui chu a leilung a ṭhat tawk loh vangin construction agency lam pawhin harsatna an tawh phah nia sawi a ni. Hetihlai hian India lam chinah chuan chak takin hna hi thawh theih a ni thung.
Indo-Bangla railway project, km 15-a thui siam mek hi hman theih a nih hunah chuan Agartala leh Kolkata inkar hlat lam pawh 50% zetin a tawi phah dawn a ni. Indian railway map-ah chuan Agartala leh Kolkata inkar hi km 1,613 a ni a, mahse rel kawng siam thar mekah hian km 514 chauh a ni thei tawh ang. Hei hi khualzinte chauh ni lo, sumdawnna lam thleng pawhin an hlawkpui thei ang.