Tui hman thianghlim tawk loh vangin Accoland water park khar

Assam state khawpui Guwa­hati khaw dai, Patagon-a awm Accoland Amusement Park chu Thawlehni chawhnu lam aṭang khan an khar hrih dawn tih Kamrup (metro) district adminis­tration te chuan an puang.

District thuneitute chuan he water park-a an tui hman quality chu a thianghlim tawk lo tih sawiin khar a nih hrih dawn thu an puang a ni.

Kamrup (metro) deputy com­mi­ssioner Virendra Mittal chuan additional deputy commissioner Ranjit Konwar-a kaihruai team te chuan amuse­ment park-a an tui hman te chu a thianghlim tawk lo tih leh tui quality hman tur standard a phak lo tih an hmuh­chhuah hnuah khar tura thupek hi tihchhuah a ni ta a ni, a ti.

Mittal chuan an khar chen tur a sawi theih loh thu leh tui bakah facility dang pawh mipuite tana him tura buatsaih a nih veleh an hawn leh dawn thu a sawi.

DC chuan he park tlawhtu mi ṭhenkhatin park an tlawh hnuah an mit lamah harsatna, mitmim emaw mit thak emaw an neih ṭhin thu te, skin infection te an neih thu bakah an tui hman a thianghlim tawk lo tih complaint a luh hnuah enfiah tura a tih thu a sawi. An enfiahna report chuan amusement park-ah chuan manage­ment aṭhat tawk loh thu leh an tui hman pawh mihring hriselna khawih pawi thei, a bik takin naupang leh ṭhalai lamah nghawng nei thei tih hmuhchhuah a nih thu a sawi.

Tun hi district thuneitu ten amusement park hi an khar vawikhatna a ni lo a, 2015 July thla pawh khan water park-ah hian himna a ṭhat tawk loh vangin mi pakhat kum 45 mi in nunna a chan avangin khar a lo ni tawh a ni.