Meghalaya-ah ni 15 chhung sangha lakluh khap Sangha-ah formalin hmang tih hmuchhuak

Meghalaya sorkar chuan kar hmasa Thawh­lehni khan state chhunga sangha lakluh a khap tih a puang a, a tuk lawkah Health and Family Welfare Minister, Alexander L Hek chuan sanghaah formalin hmuhchhuah a nih hma chuan sangha lakluh an khap dawn lo tih puang hnan ve leh. Mahse Meghalaya sorkar chuan Thawhṭanni khan thuchhuah dang siam lehin ni 15 chhung atan sangha lakluh khap a nih thu an puang leh a ni.

Formaldehyde Detec­tion Test (FDT) kits hmanga an test hnu­ah sangha pakuaah forma­lin hman ngei a ni tih hmuhchhuah a ni a, hemi a nih avang hian ni 15 chhung sangha lakluh khap a ni dawn tih sorkar official-te chuan an puang.

Sangha test tura sam­ple an lak te hi Nongpoh, Ri-Bhoi district aṭanga an lak te a ni a, heng sangha te Andhra Pradesh aṭanga lakluh te an ni tih report chuan a tarlang.

Meghalaya Fisheries department chuan tun­hnai khan Cochin-based Central Institute of Fishe­ries Technology aṭangin FDT kit 14 an chah thleng a, hemi hmanga test an neihnaah hian sanghaah hian formalin hi an hmu­chhuak ta a ni.

Kar hmasa lam khan state sorkar chuan sangha sam­ple ṭhen­khat Public Health Labo­ratory, Guwa­hati-ah thawnin heng sample-ah te hian formalin hmuh­chhuah a nih loh avangin sorkar chuan sangha lak­luh a khap thu a puan zet tawh hnuah a sut leh a, mahse Thawhṭanni khan khap a nih thu an puang leh ta a ni.

Food Safety Commi­ssio­ner SN Sangma chuan sangha-a formalin telh report awm avanga buai chu Meghalaya chauh ni lo in hmarchhak pum an nih thu a sawi a, hriselna khawih pawi thei thil a nih avangin sorkar chuan sangha lakluh chu a khap a ni, a ti.

Sangha lakluh hi hmar­chhak state hrang hrangin an khap tawh bawk a ni.