AP Minister-in sapel ṭhinte ‘Air Gun Surrender Abhiyan’ zawm turin sawm

Arunachal Pradesh forest and environment minister Mama Natung chuan an state-a sapel ṭhinte chu an thiltihte bansan a, nungchate humhalhna tura sorkarin ‘Air Gun Surrender Abhiyan’ a buatsaih chu zawm zawk turin a sawm.

Ningania Upper Siang district-a forest and environment department-in ‘Air Gun Surrender Abhiyan’programme a buatsaiha thu a sawiah minister chuan hei hi sawiin, "Sava leh ramsate sa ei tumna rilru kan put tlat hi kan thlak a ngai tawh a, tunlai khawvelah sa pelh hi a ṭul tawh lo a ni. Kan environment tana ramsate pawimawhnate hi kan hriatthiam a hun tawh takzet a ni," a ti.

Sokarin ramvah bansan tura mipuite ngen a, ‘Air Gun Surrender Abhiyan’ programme a buatsaih hnuah hian an thiltihte bansan intiam eng emaw zat an awm tawh a, sava leh ramsa vehna atana an hman ṭhin, airgun 2,000 chuang chu thuneitute kutah an hlan tawh. Ningania programme hmanah pawh hian mi 250-in an airgun an thehlut a, heng mite hnenah hian minister chuan lawmthu a hrilh nghal bawk.

Health and family welfare minister Alo Libang pawhin thu sawiin, ramngaw leh nungchate humhalh a pawimawh thu a sawi.