Manipur: Central team in Myanmar nen inrina pillar enfiah

Manipur leh Myanamr ramri a inrina chhinchhiahna pillar, ramri aṭanga Manipur state lam km 3-a sawn nia report awm chu Nilaini khan sorkar laipui team tirh ten an enfiah.

Central team-ah hian member pathum awmin Surveyor General of India Lt Gen Girish Kumar kaih­hruaina hnuaiah Joint Secre­tary (Border Management), Minis­try of Home Affairs, J A V Dharma Reddy leh Joint Secretary (Bang­ladesh and Myanmar) Ministry of External Affairs, Sripriya Rangnathan-ten an enfiah a ni.

Endiktu team hian pillar number 81, Kwatha Khunou thingtlang khuaa sawn nia sawi chu an enfiah a, he thu ziah lai hian an thil hmuhchhuah chungchang report an la tarlang lo.

Hetihlai hian Manipur Chief Minister N Biren Singh chuan July 12 khan India-Myanmar inter­na­tional boundary chu khawih chet a nih loh thu a sawi thung.

Ramri chhinchhiahna Ma­nipur lama sawnluh nia sawi awm avangin sorkar laipui hnenah enfiah tur team tir turin an ngen thu a lo sawi tawh bawk.

Tengnoupal Deputy Co­mmissioner Tombikanta chuan thla hmasa khan ramri a tlawh­naah border pillar 81 hi Manipur lam km 3-ah sawnluh a nih thu a sawi a, a thusawi hi tualchhung mite bakah pawl ṭhenkhat in a dik thu an sawi ve bawk a ni.