Nagaland sorkar in dan loa Assam aṭanga lut dang dawn

Nagaland sorkar chuan thu­chhuah siamin Assam-a national register of citizens (NRC) kalpui mek avanga dan loa an state chhung luh tumte chu dang turin hma an lak thu an sawi.

Nilaini-a official thuchhuah an siamah Nagaland police-te chu Assam nena an inrinaah an state chin lut turte enfiah tura dah an nih thu an sawi a ni.

Chief secretary Temjen Toy kaihruaina hnuaia home leh police department ten meeting an neihnaah he thutlukna hi an siam a, Chief Secretary chuan NRC kalpui mek chu uluk taka an lo thlithlai ve reng thu a sawi.

Thuchhuah an siamah chuan Indian Reserve Battalion (IRB) chu ramri-ah hian dah belh an nih dawn bakah flying squad te pawh dah belh an nih dawn thu an tarlang. Village council hnenah pawh lehkha thawnin dan loa state chhunga lut an awm leh awm loh enfiah tura an hriattir thu an sawi bawk.

Deputy commissioner-te hnenah pawh hemi kawnga fimkhur tura hriattirna pawh an tichhuak tawh tih an sawi a, in luahtur neitute pawh an in luahte ID enfiah tura an duh thu an sawi bawk a, rinhlelhawm nia an hriatte chu in luah loh tir ngam tura hriattir an nih thu an sawi bawk.