Covid-19 : Hmarchhak dinhmun

Arunachal Pradesh-ah Changlang, West Kameng leh Tirap-a quarantine centre-a awm zinga mi paliin Covid-19 an kai tih hmuh chhuah belh a ni. Hri kai hmuh tawh hi mi 94 an awm tawh a, an zinga pasarih chu enkawl dam an ni tawh thung. 

Hri kai hmuh tharte hi taksaa natna lang chhuak lo, asymptomatic vek an ni tih health department chuan a sawi. 

Arunachal Pradesh-a hri kai hmuhte hi quarantine centre-a awm lai vek an ni a, khawtuala inkaichhawng an la awm loh avangin AP chu Green Zone-ah a la awm reng a ni. 

Thawhṭanni khan hri kai hmuh chhuah belh mi 151 an awm. Assam-a hri kai hmuh tawh hi mi 4,309 an awm tawh a ni. 

Hri kai zinga mi 2,205 chu enkawl dam ni tawhin, damdawiin aṭangin chhuah tir an ni tawh. 

Assam-ah Covid-19 kai hmuh hmasak ber chu March 31 kha a ni a, nimin thleng khan mi 2,17,088 chu RT-PCR test neih sak an ni tawh tih health minister Himanta Biswa Sarma chuan a sawi. Test zinga a tam ber hi Gauhati Medical College and Hospital (GMCH) ah  neih a ni. Test-na hmun an neih belh zel avangin ni khatah mi 10,000 an test thei tawh tih minister chuan a sawi bawk. 

Guwahati khawpuia zin chhuahna nei lo zinga hri kai hmuh an awm avangin mipuia hri a darh tur venna pawh chak zawka kalpui mek a ni. Ni 15 chhungin Guwahati-a cheng sample 50,000 lain test a ni dawn tih Sarma chuan a sawi. Hospital-a sample lak tir duh lohte tan pawh testing centre 12 an siam tur thu a sawi a ni. 

Manipur-ah Thawhṭanni khan hri kai hmuh belh mi 32 an awm a, heng mite nen hri kai hmuh tawh hi mi 490 an tling tawh. Hri kai hmuh tharte hi state dang aṭanga haw vek an ni. 

Thawhṭanni vek khan hri kai enkawl mek zinga 60 chu an dam tawh avangin damdawiin aṭangin chhuah tir an ni bawk. 

State sorkar chuan hmun dang aṭanga haw zingah hri kai hmuh belh zel an nih avangin, Civil Aviation Ministry hnenah ni 10 chhung, June 18-28 chu an state-a thlawhtheihna thlawh luh tir rih lo turin a ngen.  State dang aṭanga lutte hi an sample laksain RT-PCR test neih sak zel an ni a, mahse haw an ṭhahnem avangin sample endik tur hi a inkhawlkhawm hnem tawh a,  hei vang hian thlawhtheihna service pawh tihtawp lailawk rih an tum a ni. Chief secretary Suresh Babu chuan sample lak tawh, result la hriat loh hi 15,000 zet a awm tawh tih a sawi. 

All Naga Students’ Association, Manipur (ANSAM), Democratic Students’ Alliance of Manipur (DESAM) leh Apunba Ireipakki Maheiroi Singpanglup (AIMS) chuan hri kai hmuh belh zel an nih avangin state chhunga district tinah Covid-19 testing laboratory dah vek turin sorkar an phut. 

Meghalaya-ah Thawhṭanni khan hri kai hmuh belh an awm lo. Hri kai hmuh tawh hi mi 44 niin, pakhatin a thihpui tawh a ni. Hri kai zinga 26 chu enkawl dam an ni tawh bawk. 

Health minister Al Hek chuan Thawhṭanni thleng khan sample 14,147 test a ni tawh tih sawiin, heng zinga 800 result chu la nghah mek a ni, a ti. 

Deputy chief minister Prestone Tysong chuan lockdown avanga sakhaw biakna hmun hrang hrangte khar la ni mah se, state sorkar chuan khuahkhirhna khauh tak hnuaiah inneih inkhawm erawh neih a phalsak tawh tih a sawi. 

Nagaland-ah nimin zing khan sample 316 endik zinga pahnih chuan Covid-19 an kai tih hmuh a ni a, anni nen hian hri kai hmuh hi mi 179 an tling tawh a ni. 

Health minister S Pangnyu Phom chuan an state-a hri kai  hmuhte chu hmun dang aṭanga haw vek an nih thu a sawi a, Thawhṭanni khan enkawl zinga pali chu an dam a, mi 92 enkawl dam an ni tawh tih a sawi. Enkawl mek hi 87 an la awm. 

Sikkim-ah  Covid-19 kai pakhat hmuh belh a ni a, ani nen hian hri kai hmuh tawh hi mi 64 an tling tawh a ni.  

Health Department secretary Dr Pempa Tshering Bhutia chuan hri kai hmuh thar hi Mumbai aṭanga haw a ni tih a sawi. 

State sorkar chuan July 1-a an state chhunga zirna in hrang hrangte hawn a tum chu a ṭhulh leh a, August thlaah hawn turin a sawn. Hei hi chief minister Prem Singh Tamang hoa state task force high level meeting neihnaah an rel a ni. 

Tripura-a hri kai hmuh chu mi 1,089 an ni tawh a, kai thar 10 hmuh a ni. 

Chief minister Biplab Kumar Deb chuan Thawhṭannia sample 1,529 endik zingah mi 10 an positive tih a sawi a, an zinga pakua chu Sepahiljala district mi niin, South Tripura district mi pakhat a awm bawk. 

CM chuan Thawhṭanni thleng khan  hri kai enkawl dam chu 433 an awm tawh tih tih sawiin, 637 enkawl mek an ni, a ti. 

Tripura-ah hian sample 48,994 lakkhawm a ni tawh a, heng zinga  47,678 chu endik a ni tawh a ni. 

State sorkar chuan hri leng avanga zirna in khar mekte hawn an nih hun ngaihtuahtu tur high-level committee a din. Committee-ah hian member 32 awmin, boruak awmdan thlirin zirna in hawn hun leh, kalpui dan turte an ngaihtuah dawn a ni.