Nagaland-a kawngzawh huaihawtah tel ṭhahnem

Mon district-a security force-ten civil mi 14 an kahhlum avanga Kohima-a lungawi lohna kawngzawh huaihawtah tel an thahnem hle.

He kawngzawh hi Naga Students' Federation (NSF) buatsaihin Zirtawpni khan neih a ni a, state chhunga pawl hrang hrangin an thlawp a ni. North East Students' Organisation (NESO) hruaitute pawh an tel.

Kawngzawhte chuan sipaite kut tuara thite tan rorelna dik an phut a, sipai thuneihna sang pekna Armed Forces Special Powers Act (AFSPA) hlih an phut bawk.

Prime minister Narendra Modi hnena hlan tura memorandum an thehluhah, NSF chuan Oting khuaa civil kahhlum an nih dan chhui turin Supreme Court/High Court judge hlui kaihhruai committee din an phut. "Sipaite hi AFSPA in a humhim avangin Nagaland sorkarin a din Special Investigation Team (SIT) chuan a nih ang turin an lakah action an la thei dawn lo a ni. Hei bakah sorkar laipui chuan intelligence agency-te tih dik loh chu pawmin, Naga mipuite lakah thupha a chawi tur a ni," an ti.