Hmarchhakah Guwahati khawpui boruak bawlhhlawh ber

New Delhi-a hmunpui nei, Centre for Science and Environment report tihchhuahah, Guwahati khawpui chu hmarchhak biala boruak bawlhhlawhna ber a ni.

Zirchianna an neihah Guwahati khawpui air pollution level hi kumin kumtir atanga Noverber 30 thleng khan chawhrualin PM2.5 level a ni. Kumin chhung hian Guwahati khawpui boruak hi ni 54 chhung chu severe/ very poor category-ah a awm.

Kum 2020 chhunga khawpui pollution level hi kum 2019 aiin a sang a, khawpui boruak hi a bawlhhlawh chho zel tih a chiang hle a ni.

Hmarchhak biala khawpui dang boruak chu 'good' leh 'satisfactory' te tam zawk mah se, 'poor' leh 'very poor' category-a awm ni pawh an nei chho ve ṭan ta ni. Agartala khawpui boruak chu ni 10 chhung 'very poor' category-ah a awm ve hman a, Kohima chu ni hnih a awm bawk. Khawpui dangte erawh chu data a ṭhat tawk loh avangin chhut chian theih an ni lo.

CSE hian Assam, Meghalaya, Tripura, Nagaland, Mizoram leh Arunachal Pradesh state air quality hi an zirchiang a ni.