Manipur-ah silai 8,640 theh lut tawh

Manipur sorkarin a ngenna chhangin, kar liam ta Zirtawpni thleng khan thuneitute hnenah silai 8,640 theh luh a ni tawh

State sorkar chuan nakkum kumtir lamah assembly inthlan an neih dawn avangin, inthlan vuakvetah boruak ṭha leh muanawm a awm theihna turin silai kawlte chu an hnaih ber police station-ah thehlut turin a ngen a ni. Official chuan Manipur-ah arms license nei hi mi 25,300 vel an awm niin a sawi.

Manipur Home Department official chuan district 16-a deputy commissioner tinte hnenah an silai kawlte thehlut vek tura hriattirna hi an tichhuak tih a sawi. Sorkar thupek anga silai leh silai mu an kawlte an thehlut lo a nih chuan Arms Act, 1959 leh Arms Rule, 2016 hnuaiah hrem theih an ni dawn tih a sawi bawk.

Seat 60 awmna, Manipuir Assembly inthlan hi nakkum February-March inkara neih rin a ni. Manipur bakah Uttar Pradesh, Punjab, Uttarakhand leh Goa te pawhin inthlan hi an nei dawn a ni.