Khasi hmeichhia hnam dang pasal nei ; ST status laksak dawn

Meghalaya-a Khasi Hills Autonomous District Council (KHADC) chuan Khasi hmeichhia ten Khasi ni lo, hnam dang mi pasal an neiha an Scheduled Tribe status hlihsakna tur social custom bill chu Nilaini khan a pawm.

He bill an pawm thar hi Khasi Hills Autonomous District (Khasi Social Custom of Lineage) (Second amendment) Bill, 2018, tih a ni a, he bill hnuaiah hian Khasi hmeichhia in hnam dang pasal an neih chuan an fa te pawh Khasi-ah pawm an ni dawn lo. Tribal mi tho hnam dang pawh nei mah se he bill hian hnam dang hrim hrim chu a huam vek dawn a ni.

Khasi Hills Autonomous District (Khasi Social Custom of Lineage) (Second amendment) Bill, 2018-ah hian Bill awmsa Section 3 chu siamṭhat niin sub-section thar, 3(d) chu belh a ni bawk. Section 3(d)-ah hian 'Khasi hmeichhia tupawh Khasi mi ni lo pasal nei emaw Khasi mi ni lo laka fa nei chu Khasi ni lo anga pawm an ni ang a, Khasi an nihna pawh an hloh bawk ang a, Khasi an nihna anga hamṭhatna an hmuh ṭhin ang zawng zawng pawh an dawng thei tawh lo ang' tih dan chu belh a ni.

He bakah hian Section 2 hnuaiah sub-section (r) pawh belh niin hetah hian Khasi ni lo an hrilhfiahna an belh bawk.

KHADC chief executive member HS Shylla chuan hnam dang nena inneih pawlh chungchang sawiin ngawi renga inrunna a nih thu a sawi a, hmangaihna emaw inneihna emaw a dodal tihna a nih loh thu sawiin hengte hi chu mimal duhthlanna a nih thu a sawi.

Bill hi Thawhlehni khan pharh a ni a, Shylla chuan pharh a nih ni la la khan pawm nghal duh mah se Chairman Teinwell Dkhar chuan member-te pawmpuina a dil thung a, MDC awm zawng zawng chuan Nilaini khan an pawm vek thung a ni.

KHADC CEM chuan Khasi Social Custom of Lineage chu an hmansual nasat thu sawiin tunah chuan an hnam tihdan phung leh matrilineal system an hman chu an vawnhnim a ṭul tawh takzet tih a sawi a, People’s Democratic Front (PDF) MDC Grace Mary Kharpuri pawhin hnam dang nena inneih pawlh chu Khasi hnam tana thil hlauhawm a la ni thei tih chu a pawm thu a sawi ve bawk.

Shylla chuan Khasi mipa te pawhin hnam dang an neih phal lohna dan an la lekkhawh a ngaih hun te pawh a la thlen dawn thu a sawi bawk a ni.