Meghalaya: MPSC office beihna thubuai kal zelah MCS officer suspend mek man

Meghalaya Public Service Commission (MPSC) office petrol bomb hmanga beihna thubuai kalzelah a bultumtu ber nia hriat Meghalaya Civil Service (MCS) officer suspend mek chu Nilaini khan police ten an man.

MSC officer an man hi kum 2015-a PJ Marbaniang thihna case-ah pawh khan man a lo ni tawh nia tarlan a ni.

East Khasi Hills Superintendent of Police (SP), Davis NR Marak chuan he pawikhawihnaa inhnamhnawih mi panga an man tawh thu a sawi a, a pangana hi chu a bultumtu ber a nih thu leh Lumdiengjri Police hnenah Thawhlehni khan amah a inpek thu a sawi.

SP chuanb IPC hnuai section hrang hrang leh Prevention of Corruption Act hnuaiah an mi man lakah hian thubuai ziahluh a nih thu a sawi bawk.

Hetihlai hian SP chuan an mi man chu tunge a nih puanzar a duh loh thu a sawi a, MSC officer suspend mek a nih thu chauh a sawi a ni. An mi man hi Ningani khan court-ah hruai a ni a, hemi hnu hian police kutah hlan a nih rin a ni.

Marak hian an mi man chu tunge a nih puangzar lo mah se mi ṭhenkhat chuan Jirang Block Development office-a Block Development Officer Het(BDO) hlui, Granville Hardy Passah niin an sawi thung.

MPSC building hi July 10 zingkarah khan mi tu tih hriat loh ten petrol bomb hmanga beiin Commission’s Secretary WAB Booth office-a document pawimawh leh computer-te an bomb chhia a ni.

He pawikhawihna chhuichiang tur hian special investigating team (SIT) din nghal a ni a, July 23 khan mi pali an man a, a pangana leh a bultumtu ber hi Nilaini khan an man ve leh ta a ni.

Police-te chuan building beih a nih chhan chu an la hriat loh thu leh Court-ah an mi man ber pawh a la awm avangin thu an la zawhfiah theih loh thu an sawi.