Manipur border Pillar no. 81 a awmna tur dik takah awm

Surveyor General of India, Lt. Gen. Girish Kumar leh a kaihhruai central survey team te chuan Manipur-a ramri chhinchhiahna pillar sawi hlawh tak chu India leh Myanmar in 1967-a inremna an ziaha a awmna tura an inremna hmun ngeiah a awm thu an sawi.

Central survey team-ah hian ministries of Home Affairs senior official, External Affairs official leh Surveyor General of India-te an tel a, Ningani khan Indo-Myammar border-a pillar no. 81 a awmna insawn nia sawi chu an enfiah a, an enfiah hnu hian thuchhuah siamin a awmna tur hmun dik taka a la awm reng thu hi an sawi ta a ni.

Enfiahtu team hian a awmna tur dik takah a awm thu sawi mah se United Committee Manipur (UCM) chuan an enfiah danah an lungawi loh thu an sawi thung a, an enfiah dan chu a mumal lo tiin mit a tlung lo hle a ni, an ti.

UCM presidert Sunil Karam chuan hmanrua engmah hmang muiah lo in engtin nge pillar chu a awmna hmun tur dik takah a awm tih an hriat theih? tiin zawhna a zawt let thung.

Congress thupuangtu Hareshwor Goswami chuan 1967 inremnaah kha chuan pillar chu Namjetlok lui piah lama awm tur a nih thu a sawi a, pillar chu a awmna hmun a dik loh thu sawiin central team te chu pillar awmna tur dik tak chu enfiah turin a ti a ni.

Thla hmasa khan pillar hi India ram chhung km 3 laiah a awm nia sawi a ni a, hei hi tualchhung mite leh civil society te pawhin thudik a nih thu an lo sawi tawh nghe nghe.