Tripura: CPI-M hruaitu lakah FIR thehluh

Tripura police-te chuan Communist Party of India- Marxist (CPI-M) hruaitu lu Deputy Speaker Pabitra Kar, minister hlui Badal Chowdhury leh Ratan Bhowmick -te lakah phalna nei loa punkhawm an huaihawt avangin FIR an thehlut.

Poilce-te chuan CPI-M hruaitute hian Thawhlehni khan ‘murder of democracy’ thupui hmangin punkhawm an huaihawt thu an sawi a, he an punkhawm huaihawt tur atan hian police hnenah phalna an lak hmasak loh avangin a huaihawttute lakah hian FIR an thehlut tih an sawi.

West Tripura superin­tendent of police, Ajit Pratap Singh chuan Pabi­tra Kar lakah hian Tripura Police Act section 82 leh CRPC 107 (security for keeping peace) hnuaiah thubuai an ziahluh thu a sawi bawk.

Case ngai thoah hian Chowdhury leh Bhowmick-te lakah hian thubuai ziahluh a nih thu a sawi a, anni hian Gomati district-a Udaipur-ah punkhawm an huaihawt thu a sawi a ni.

Hetihlai hian Kar chuan an punkhawm huaihawt chu national program a nih thu a sawi a, punkhawm an huaihawtnaah hian BJP worker-ten an beih thu sawiin, CPI-M mi 25 laiin hliam an tawrh thu leh police-te pawhin an hmuh reng thu a sawi.