Nagaland-ah AFSPA hlip tura phutna thawm a ring zel

Nagaland-a secruity force-ten civil mi 14 an kahhlum hnuaa sipai thuneihna sang pekna, Armed Forces Special Powers Act (AFSPA) hlih phutna thawm a ring zel a, dan sakei tia sawi ṭhin AFSPA hlip tura sorkar nawrtu an pun belh zel a ni.

Pathiannia Dimapur-a Christian Higher Secondary School-ah December 4 leh 5-a Mon district-a pawisawilo civil mi 14 kahhlumte sunna hun hmanah, state chhunga pawl hrang hrang 16-te chuan AFSPA hlih an phutna thu, public declaration an siam leh a ni.

He hun hi Forum for Naga Reconciliation (FNR) buatsaih niin, FNR kaltlang hian pawl 16-te chuan Nagaland state chauh ni lo, hmarchhak bial pum aṭanga AFSPA sut an phutna hi an chhuah a ni. Hei bakah Oting khuaa security force-ten an kahhlumte tan rorelna dik phutin, civil mite kaptu 21 Para Special Forces Regiment commanding officer leh sipaite laka disciplinary action la turin an phut bawk.

An thuchhuahah hian Mon district-a pawikhawihna thleng chu Naga mipuiten an dinhmun tawn mek an hriatchian leh midangte hriata an puanzar theihna remchangah hmang turin an chah. Naga political group hrang hrangte pawh an inhriatthiam lohna te dah ṭha a, Naga mipuite dikna chanvo humhalh tura inlungrual taka awm turin an ngen bawk a ni. Party politics leh mahni ṭhatna tur ringawt ngaihtuah loin, tharum thawhna telloin state an hmangaihzia lantir turin an chah a, Naga mipuite pawh an mawhphurnate hria a, hnam ṭhenhran theihna lam hawi engmah ti lo turin an ngen bawk a ni.

Nimin khan Nagaland Legislative Assembly emergent session chu neih a ni bawk a, session-ah hian Nagaland aṭanga AFPSA hlih phut chungchang hi ngaihtuahin, resolution pawh an siam rin a ni. Chief minister Neiphiu Rio leh MLA dangte pawhin AFSPA hlih a ṭul thu hi an lo sawilang fo tawh a, December 7 khan Nagaland cabinet chuan sorkar laipuiah he dan hlip tura nawr an lo rel tawh bawk.